Tamil Nadu politics buaina la ziaawm thei lo

Tamil Nadu chief minister dinhmun inchuha rorellai, AIADMK party chhunga buaina chuan ziaawm lam a la pan thei lo.

Acting Chief Minister O Panneerselvam-a leh AIADMK general secretary VK Sasikala-i te chuan chief minister nih an inchuh mek a, thlawptu pawh an ngah tawk niin an insawi ve ve a ni. Hetih lai hian Governor Vidyasagar Rao chuan chief minister thar lakluh hun tur chu a la tikhawtlai.

Sasikala-i chuan kar kalta Inrinni khan Governor Rao chu lehkha a thawn a, Tamil CM atana laklkuh a nih hun tur chu a rang thei anga kalpui turin a ngen. Sorkar siam turin thlawptu a ngah tawh a, a ṭul a nih chuan Governor hmaah MLA-te pawh a hruai theih tur thu a sawi. Sasikala-i chuan amah thlawptu MLA-te hnenah Governor-in CM lakluh hun a tihkhawtlai chhan chu an party chhunga buaina chawhchhuah tumna a ang a tih thu a sawi.

Hetih lai hian party MLA zingah Panneerselvam-a thlawptu an awm belh zel. School Education Minister K Pandiarajan chuan CM camp chhuahsain, Panneerselvam a thlawp dawn tih a sawi a, hemi hnu hian party hruaitu hlun leh thupuangtu, C Ponnaiyan pawhin Panneerselvam chu a chenna inah hmuin a thlawp dawn tih a hrilh ve leh bawk. AIADMK MP 50 zinga 10 chuan Panneerselvam lamah an ṭan tur thu an sawi tawh bawk.

Panneerselvam hian thlawptu MLA pasarih a nei tawh. Hetihlai hian member 235 awmna Tamil Nadu assembly-ah hian AIADMK chuan MLA 135 a nei mek a ni. Panneerselvam lam chuan Thawlehni-ah chuan an party MLA tam zawkin an zawm an beisei thu an sawi. MLA-te hian Sasikala-i an thlawpna an hnuhdawh hlauhthawn avangin, Chennai khawpui aṭanga km 100 vela hlaa luxury resort-ah ni thum chhung khungkhawm an ni tawh. Panneerselvam chuan MLA-te hi pawnlam pawh bepawp thei lo tura khung beh niin a sawi a, mahse Sasikala-i thlawptu lam chuan MLA-te hian an duh thu ngeiin an phone an switch off niin an sawi thung.