Tamil Nadu : Panneerselvam-a’n CM hna thawh chhunzawm

Tamil Nadu chief minister dinhmun inchuha buaina chu chinfel a la ni lo a, acting CM Panneerselvam pawh a la inphahniam duh lo a, nimin aṭang khan office a kal chhunzawm.

Kar khat chhunga a chawlh lailawk hnuah nimin khan Panneerselvam hian office a kal chhunzawm leh a, Governor C Vidhyasagar Rao chu a piancham lawmpuina a hlan bawk. February 5 khan AIADMK hruaitu thar leh CM hlui J Jayalalithaa-i hnungzuitu, VK Sasikala-i tana kawng hawngin CM a nihna aṭanga banna a thehlut a ni. Mahse a hnu lawkah Panneerselvam-a hi a hel leh a, CM aṭanga bang tur hian Sasikala-i leh party hruaitu ṭhenkhatten an nawr lui niin a sawi leh a ni.

Panneerselvam hian an party hruaitute laka a hel hnua Governor a hmuh ṭum pawhin, state mipuite leh party member-te duhdan a nih chuan banna a thehluh tawh pawh a hnukkir leh tur thu a sawi.

Sasikala-i thlawptu lam chuan CM thar atana la lut thuai turin Governor an ngen a, sorkar siam turin rorellai party AIADMK MLA tam zawkin an thlawp tih an sawi.

Sasikala-i hian AIADMK MLA 127-te thlawpna a hlauh avangin, Chennai khawpui daia resort-ah MLA-te hi a khung khawm mek niin Panneerselvam chuan a sawi. Heng MLA-te hian an phone an switch off vek avangin biak pawh theih an ni lo. Panneerselvam chuan MLA te hi chu chhuah zalen a, an duhthu anga thutlukna siam tir an nih chuan assembly-ah amah zawk an thlawp vek dawn tih a sawi. Mahse state police-te chuan heng MLA-te hi hren luih an nih loh thu leh, an mahni duh thua awm an ni tih Madras High Court a hrilh a, nimin khan Sasikala-i chuan MLA-te awmna kawtah hian press conference koin, party MLA-te pawh an ṭhuchhuak a ni.

Panneerselvam-a hi AIADMK MLA pasarih leh MP 10-te’n an thlawp thu an sawi tawh a, an zingah hian party hruaitu hlun E Madhusudhanan pawh a tel.

BJP hruaitu hlun Subramanian Swamy-a chuan Tamil Nadu politics buaina chinfel a nih thuai theih nana inrawlh turin sorkar laipui a ngen. Swamy hian Governor-in Sasikala-i chu sorkar siam tura a koh thuai phutin Supreme Court-ah petition a thehlut bawk. BJP hruaitu hian AIADMK party chhunga buaina awm mekah union minister ṭhenkhat chu inrawlhah a puh a, mahse an hming erawh a sawilang duh lo a ni.