Hindu sakhaw zuituten midang an inleh tir ve lo : Rijiju

Minister of State for Home Affairs Kiren Rijiju chuan India rama Hindu awm zat chu an tla­hniam zel niin a sawi a, a chhan ber chu Hindu hian sakhaw dang betute inlet turin a ti ve ngai lo a ni, a ti.

Rijiju chuan hemi chung­chang hi a Twitter-ah ziak langin, Hindu-te chuan sakhaw dang betute chu an sakhuaa inlet turin an nawr ve ngai lo a, hei vang hian ram dang ang lo takin pawl tlem zawkte chu an pung chak a ni, a ti.

He thu hi Arunachal Pra­desh Congress Committee-in, Prime Minister Narendra Modi-a kaihhruai BJP sorkarin Arunachal Pradesh chu Hindu state-ah leh a tum tia an puhna a chhan letna a ni.

Rijiju chuan Congress party chu inhuatna chawk chhuak thei thu sawichhuakah a puh a, hetiang hawi zawnga thu an sawi chhan a zawt let. “Congress chuan hetiang thu hi an sawi­chhuak tur a ni lo. India hi sakhaw tin zalenna ram a ni a, sakhua leh pawl hrang hrangten zalenna neiin thlamuang takin an awm ho vek a ni” a ti. Rijiju hi Buddhist sakhaw zuitu a ni.

All India Majlis-e-Ittehadul Muslimeen (AIMIM) chief Asaduddin Owaisi chuan Rijiju hi lo chhang let nghalin, Hindu tan chauh ni lo, India mipui zawng zawng tana minister a ni tih hrereng turin a chah.

Kum 2011 census-a a landanin, India ram mipui zinga 79.80% chu Hindu sakhua zuitu an ni a, Muslim 14.23%, Kristian 2.30%, Sikh 1.72%, Buddhist 0.70% leh Jains 0.37% an awm.

Kum 2001 census-ah khan Hindu awm zat chu 80.5% a ni.