Vyapam scam : CBI-in medical zirlai nuai 9.5 record enfiah

Madhya Pradesh-a me­dical entrance examination tihchingpen thubuai kal zelah, Central Bureau of Investigation (CBI) chuan ram­chhung hmun hrang hranga medical zirlai nuai 9.5 chuang record a enfiah hnuah, midang exam saktu mi 121 a chhui chhuak tawh.

Madhya Pradesh Professional Examination Board (MPPEB), Vyapam tia sawiin kum 2009 leh 2010-a Pre-Medical Test (PMT) leh pre-PG (medical) entrance a buatsaihah khan zirlai sang tel an inlan a, zirlai tam zawk hian online hmangin application form an thehlut a ni. Online hmanga form thehluhah hian thlalak dah tel a ni a, mahse an zinga ṭhenkhat chuan dik lo taka thil tiin, exam-ah hian midangin an lo chhan sak a ni.

Kum 2015 khan exam-a thil dik lo awm chung­changah Supreme Court-ah FIR thehluh a ni a, CBI chuan a chhui zui ta a ni. CBI chuan candidate anga inchhal a, midang exam sak mi 300 an awm tih a chhui chhuak a, heng zinga mi 121 chu hriatchhuah an ni tawh.

CBI team hian state paruk - Delhi, Uttar Pradesh, Madhya Pradesh, Maharashtra, Rajasthan leh Bihar state-a medical college leh medical coaching institute hrang hrangte a enfiah a, thla ruk chhungin heng zirna-ina zirlai nuai 9.5 chuangte chu an chanchin kimchang, an thlalak nen an enfiah a ni.

Kum 2015 aṭang khan CBI-a Special Investigation Team (SIT) chuan Vyapam scam hi a chhui ṭan a, thubuai 170 ziak lut tawhin heng zingah 74-ah chuan final report thehluh a ni tawh.