SC-in Sasikala-i thiam loh chan tir AIADMK aṭangin Panneerselvam hnawtchhuak

Tamil Nadu politics buaina chuan zual lam ala pan zel a, chief minister thar tura beisei All India Anna Dravida Munnetra Kazhagam (AIADMK) general secretary VK Sasikala-i chu a sum lakluh phu loa hausaa puhna thubuaiah Supreme Court-in thiam loh a chantir a, acting CM O Panneerselvam chu AIADMK party aṭanga hnawhchhuah a ni bawk.

Supreme Court chuan kum 61 mi, Sasikala-i hi eiruk thubuai a neih mekah thiam loh chantirin kum 4 tang turin a hrem a, cheng vaibelchhe 10 chawi tura tih a ni bawk. Sasikala-i hi kum 10 tang tura tih ni a, mahse a hmaa kum ruk a lo tan tawhna chu chhiar tel a nih dawn avangin a bak kum li a tan a ngai dawn a ni. Court-in thiam loh a chantir avang hian Sasikala-i hian kum 10 chhung inthlanah a chuh thei dawn lo a ni. Court thutlukna puan lai hian Sasikala-i hi a awm ve lo a, an party MLA-te awmna Chennai khawpui daia resort-ah an awmkhawm a ni.

Thiam loh chantir a nihna thubuai hi kum 21 chhung zet buaipui a ni tawh. He thubuaiah hian Sasikala-i kaihhruaitu ber leh Tamil Nadu chief minister hlui J Jayalalithaa-i pawh a tel a, mahse nikum December thla khan a thi tawh a ni. Court chuan Sasikala-i hremna tur a puan lai hian police hnenah inpe nghal turin a hriattir bawk.

Sasikala-i thiam loh chantir a nih vang hian amah thlawptuten buaina an siam ven thawn thilah venhimna pawh khauh taka kalpui nghal a ni. Sasikala-i leh AIADMK MLA-te awmkhawmna, Chennai khawpui daia luxury resort-ah pawh anti-riot police 200 chuang dah nghal an ni.

Court-in man tura thupek a tihchhuah hnuah, Sasikala-i hi party hruaitu a nihna aṭangin a bang nghal a, an party chuan Sasikala-i thlawptu rinawm leh AIADMK hruaitu hlun Edappadi K Palaniswami chu party general secertary atan an ruat nghal. Party hotu lu ber atana lakluh a nih hnu lawkah, Palaniswami chuan AIADMK party aṭangin Sasikala-i laka hela chief minister dinhmun chuhpui mek tu, acting CM Panneerselvam chu partyaṭangin a hnawtchhuak nghal bawk.

Sasikala-i hi Jayalalithaa-i nena an inhriat tirh chuan video parlour siamin, video cassette a zuar ṭhin a, a hnuah Jaya-i hnung hi a zui chho ta a ni. Sasikala-i chhungte chu Jaya-i hming an mimal hlawkna atana lo hmang ṭangkaia puh an nih avangin, Jaya-i hian Sasikala-i hi hun rei vak lo chu AIADMK aṭangin a lo hnawtchhuak tawh a ni. Mahse Sasikala-i hian a pasal a thlauthlak thu a puanchhuah avangin a la let leh a ni. Sasikala-i hi Jaya-i chenna, Poes Garden-ah a cheng zui a ni. Kum 2014 khan an pahnih hian eiruk thubuaiah man an lo ni tawh a, mahse an appeal hnuah thiam chantir leh an ni. Sasikala-i leh a chhungte hi Mannargudi Mafia tia hriat an ni ṭhin a, inremna felfai tawk lo leh eirukna hrang hrangah an inhnamhnawih fo a, an chhungkua hian AIADMK-ah thuneihna sang tak neiin an party thu puanchhuahna ber, Jaya TV pawh an enkawl a ni.