Tamil Nadu buaina inṭan chhoh dan
Nikum Decemcer thlaa chief minister hlui Jayalalithaa-i a thih khan CM hna hi Jaya-i mi rin tak, O Panneerselvam kutah hlan a ni. Mahse a hnuaah party hotu lu ber atan Jaya-i hnungzuitu leh a ṭhian hlun, Sasikala-i thlan a ni.
Party MLA-te’n Sasikala-i chu CM anih theih nan AIADMK legislative party hruaitu atan an thlang a, hemi hnu hian Panneerselvam chuan Sasikala-i tana kawng kian turin CM a nihna aṭangin banna a thehlut nghal.
CM thar la lut tura inbuatsaih chhoh laiin, Panneerselvam hian a ngaihdan thlakin Sasikala-i lakah a hel leh a, banna thehluh turin Sasikala-i leh minister ṭhenkhatin an nawr lui niin a sawi. He thu a sawi chhuah hnu hian Sasikala-i chuan party treasurer a nihna aṭangin a ban a, mahse ban tur hian thuneihna a nei lo niin Panneerselvam chuan a sawi.
Panneerselvam a hel hnu hian Sasikala-i chuan an party MLA-te chu ko khawmin, Chennai khawpui dai Kuvathur-a Golden Bay Resorts-ah a awmkhawm tir nghal a ni.
MLA-te hian Sasikala-i an thlawpna an hnuhdawh hlauh vangin biakpawh theih lohin an awm niin Panneerselvam chuan a sawi a, mahse Sasikala-i lamṭangte chuan an duh thu rengin MLA-te hian an mobile phone an switch off niin an sawi thung.
MLA camp-a awmte zingah Panneerselvam thlawptu lam an pung zel a, MLA pasarih chuan Sasikala-i an thlawpna hnukdawkin Panneerselvam lamah an ṭang tih an sawi tawh a, MP 11 in an thlawp bawk. Panneerselvam thlawptu hi an la pun zel rin a ni.
AIADMK hruaitu pahnihte inkara CM dinhmun inchuhna buaina a awm tak avangin Governor C Vidyasagar Rao chuan CM atana Sasikala-i lakluh hun tur hi a tikhawtlai rih a ni. Attorney General chuan Governor hnenah hian assembly inkhawm buatsaih thuai a, party hruaitu pahnihte hi thlawptu MLA an neih zat fiah thuai turin a ti.
AIADMK hruaitu thar atana thlan, Palanisamy leh Panneerselvam-te chuan CM dinhmun an inchuh leh dawn a ni. Palanisamy hian MLA term nga-na a hmang mek a ni. Zirlai hruaitu a nih aṭangin AIADMK hi a zawm a, party leh sorkarah chanvo pawimawh tak tak a lo chelh tawh a ni.