Hmaituamna hmang lote sum chawi zat tipung zel

India-ah rampum huapa nitina Covid-19 kai hmuh chhuah thar chu kar khat dawn 50,000 hnuai lam a ni tawh a, hetih lai hian festival season te an hman chhoh avangin khawpui tam takah hri kai thar hi an pung nasa hle thung. 

Thawhlehnia ram puma hri kai hmuh chhuah chu 44,376 niin, hri kai hmuh chhuah hi 92,22,216 an awm tawh. Hemi ni vek hian Covid-19 vanga thi mi 481 awm belh lehin, hripui thihpui hi 1,34,699 an awm tawh bawk. 

State sorkar hrang hrangten hri darh tur venna atan khuahkhirhna  khauh zawkte an siam thar leh hlawm a, heng zingah hian hmaituamna hman chu an dah pawimawh hle. Covid-19 damdawi leh a vaccine a la awm loh avangin hmaituamna hman ṭhat chu hri laka invenna pawimawh tak pakhat a ni a, hei vang hian mitin ten an ngaihpawimawh theihna turin state ṭhenkhat chuan a hmang lote sum chawitir zat pawh an tipung tawh a ni. 

Delhi : Kar liam ta khan chief minister Arvind Kejriwal chuan pawn chhuahna hmuna hmaituamna hmang lote sum chawi tir chu Rs 500 aṭangin Rs 2,000 ah tihsan a nih thu a lo puang tawh. Hei bakah hian vantlang hmuna chil chhak leh social distancing dan zawm lote Rs 2,000 chawi tir an ni bawk ang. 

Maharashtra : Brihanmumbai Municipal Corporation (BMC) tarlan danin, khawlaia hmaituam lote chu Mumbai-ah chuan Rs 200 chawitir tur an ni a, Pune-ah chuan Rs 500 leh khawlaia chil chhak chu Rs 1,000 chawitir theih an ni. 

Uttar Pradesh : UP sorkar chuan  pawn chhuahnaa hmaituamna hmang lote sum chawi tir ṭhin chu Rs 100 aṭangin Rs 500-ah a tisang. 

Haryana : Haryana sorkar chuan Gurgaon huamchhungah hmaituam lo chu Rs 2,500 chawitir theih a nih thu a sawi. Hei bakah hian state chhung hmun dangah Rs 500 chawitir ṭhin an ni bawk. 

Kerala : Kerala-ah chuan khawlaia hmaituam lote chu Rs 500 chawitir an ni. 

Tamil Nadu : Khawlaia chil chhak chu Rs 500 chawi tir an ni a, hmaituam lo chuan Rs 200 a chawi tur a ni tiin Tamil Nadu sorkar chuan thuchhuah a siam. 

India rama Covid-19 kai hmuh chhuah hi August 7 khan nuai 20 an tling chho a, August 23-ah nuai 30 leh September 5-ah nuai 40-ah an kai chho. September 16-ah nuai 50 tlingin, September 28-ah nuai 60, October 11-ah nuai 70, October 29-ah nuai 80 leh November 20-ah nuai 90 an tling chho hman a ni.