Rajiv Gandhi thahnaa thiam loh chantir zinga mi kum 31 a tan hnuah chhuah zalen a ni ta

Prime minister hlui Rajiv Gandhi thahnaa inhnamhnawiha puha thiam loh chantir zinga mi, AG Perarivalan chu kum 31 lung-in a tan hnuah, nimin khan Supreme Court chuan a chhuah zalen ta.

Perarivalan chhuah zalen a nih tak avangin he tualthah thubuaia thiam loh chantir, mi dang parukte tan pawh chhuah an ni ve theihna tur kawng a inhawng thei dawn a ni. Thiam loh chantir zingah hian Sri Lanka mi Nalini Sriharan leh a pasal Murugan-te pawh an tel.

Justice L Nageswar Rao chuan Supreme Court thuneihna sang neihna chu hmangin, "State cabinet chuan thil hrang hrang a ngaihtuah hnuah he thutlukna hi a lo siam tawh a ni. Article 142 tlawhchhanin, thiam loh chantir tawh hi chhuah tir theih a ni," a ti.

Chhuah zalen a nih tur thu puan a nih hnuah, Perarivalan chuan, "Thu dik chu kan lamah a ṭang zel a ni. Hei hi mipuite min lainatna leh thlawpna tel lo chuan a thleng thei lo a, capital punishment duh lotu zinga mi ka ni," tiin a sawi.

Tamil Nadu chief minister MK Stalin chuan court thutlukna chu lawmawm a tih thu a sawi bawk.

Kum 1991 ,May 21-a Tamil Nadu-a Sriperumbudur hmuna hmeichhe pakhat, Dhanu tihin thihchilh bomh hmanga prime minister hlui Rajiv Gandhi a tihhlum kha a ruahmanna ber chu Liberation Tigers of Tamil Eelam (LTTE) mi, Sivarasan-a hi nia puh a ni. He pawikhawihna thlen lai hian Perarivalan hi kum 19 mi chauh a la ni a, Sivarasan tan hian 9-volt battery pahnih leisakah puh a ni.

Rajiv Gandhi thah thubuaiah hian mi pasarih thiam loh chantir an ni. Kum 1998 khan anti-territorism court chuan Perarivalan leh midangte hi thi turin an chungthu a relsak. An zinga pakhat, Nalini Sriharan chu jail tan lai hian jail chhungah nau a hring a, kum 2000 khan Rajiv Gandhi nupui, Sonia Gandhi ngensak angin a hremna hi dam chhung tang tura tihnep sak a ni. Kum 2014 khan Supreme Court chuan midangte hremna pawh dam chhung tang turin a tinepsak.

Tamil chief minister hlui pahnih, J Jayalalithaa leh Edappadi K Palnisami-te hunlaia cabinet chuan kum 2016 leh 2018 khan thiam loh chantirte hi chhuah zalen turin an lo rawt tawh a, mahse hetih hunlai Governor-te hian cabinet rawtna hi bawhzui loin hun rei tak tihkhawtlai zui a ni.

Perarivalan hi kum tam tak jail a tan chhung hian a nungchangah pawh record ṭha tak a nei a, a tan chhung hian lehkhate zirin, lehkhabu a ziak bawk. Perarivalan chuan Sivarasan tana battery a leisak lai hian eng tur atana hman tur nge tih pawh a hre lo tih a sawi. Kum eng emaw chen a tan hnuah CBI officer Thiagarajan chuan Perarivalan inpuanna hi a khawih danglam sak nia sawiin thupha a lo chawi tawh bawk a ni.