Thil man sang leh hna nei lo tam lamin record an siam : Sachin Pilot

Congress party hruaitu Sachin Pilot chuan central-a BJP kaihhruai sorkar chuan ram chhunga thil man sang chak lutuk leh hna nei lo pung zel chungchangah na takin a sawisel.

April thla chhung khan ei leh in lam, fuel leh nitin mamawh dangte man nasa taka pungin, wholesale man punna hi 15.08% a tling. Wholesale Price Index (WPI), 15,08%-a a punna hi record thar niin, nikum April thla aṭang khan a zawnin thla 13 chhung chu WPI sanna hi double digit a ni tawh a ni.

Sachin Pilot chuan BJP sorkar chu na taka beiin, "Thil man san dan leh hna nei lo pun lamah central sorkar inrelbawlna awmze nei lo lutuk hnuaiah nitin record thar siam a ni. April thlaa wholesale price sanna chu kum 24 chhunga ram chhunga thil man a san nasat ber a ni, " tiin BJP chuan mipuite thawhchhuah leh an sum khawl vete pawh a ruksak a, ram mipui tinte rawktu a ni, a ti.