Delhi Police-ten AAP MLA an man

Delhi police-te chuan Delhi Development Authority (DDA)-in khawpui chhunga dan loa structure dinte tihchhiat hna a kalpui mek lo danga puhin Aam Aadmi Party (AAP) MLA Kuldeep Kumar chu nimin khan an man.

Police-te chuan Khichripur area-a dan loa structure dinte tichhe tura bullzoder a thlen laiin AAP MLA hian duh lohna a lo lantir tih an sawi a ni. AAP MLA hi an hreng a, demolition drive pawh tluang taka kalpui chhunzawm a nih thu an sawi bawk.

BJP thunun, Delhi civic body pathumten khawpui chhunga dan kalha din nia sawi, in leh dawrte tihchhiat hna an kalpui mek hi Delhi-a rorellai, AAP sorkar chuan a lo sawisel tawh a, tualchhung mite nawrh huaihawtnaah party MLA ṭhenkhatte pawh an tel a ni. Hei vang hian demolition drive neihna hmunah hian police pawh ṭhahnem tham tak duty tir an ni.

Thla khat liam ta chhungin civic body pathumte hian Shaheen Bagh, Jahangirpuri, Madanpur Khadar, New Friends Colony, Mangolpuri, Rohini, Gokulpuri, Lodhi Colony, Rithala, Janakpuri, Hari Nagar leh Khyala-te demolition drive hi kalpuiin, dan kalha din nia sawi structure tam tak chu bullzoder hmangin an tichhiat tir tawh.