SC-in Sasikala dilna a hnawl, Bengaluru a pan

16th February, 2017

Supreme Court chuan a sum lakluh phu loa hausaa puhna thubuaia thiam loh a chantir, Tamil Nadu-a AIADMK hotu VK Saskikala-in hun pe tura a ngenna chu hnawlin, thuneitute kuta inpe thuai turin a hriattir.

Thawhlehni khan Supreme Court chuan Sasikala-i hi thiam loh chantirin, kum li tang turin a hrem a ni.

Court thupek tihchhuah a nih hnu hian Sasikala-i chuan Bangalore trial court-ah hun pe rih turin a ngen a, mahse a ngenna hi Supreme Court chuan a hnawlsak a, a thupek lo tihchhuah tawhte thlak danglam a tum lo tih Justice PC Ghose kaihhruai bench chuan a sawi.

Sasikala-i hian thiam loh chantir a nih hnuah an party aṭanga hnawhchhuah tawh, a vahpa TTV Dhinakaran chu party-ah lalutin, deputy general secretary-ah a dah zui nghal a ni. Dhinakaran-a hi kum 2011 khan AIADMK hotu lu ber leh Tamil Nadu Chief Minister hlui Jayalalithaa-i chuan an party aṭang hian a lo hnawtchhuak tawh a ni. Sasikala-i hian party hotu ber, general secretary dinhmun chu a la chelh chhunzawm tho a ni.

Jail-a dah luh a nih hmain Sasikala-i hian amah ṭantu leh thlawptute chu party-a chanvo pawimawh chelh turin dah chhoh a tum nia sawi a ni. Thawhlehni vek khan amah thlawptu nghet tak, MLA Edappadi K Palaniswami chu legislature party leader atan thlan a ni a, party hruaitu atana thlan a nih hnuah Palaniswami hian Sasikala-i laka hel leh acting CM, O Panneerselvam chu an party aṭangin a hnawtchhuak zui a ni.

Tamil Nadu chief miniser inchuha AIADMK party hruaitute inbeihna avangin an party hi phel mai thei dinhmunah a ding mek nia sawi a ni. Jaya-in CM atana a rin ber, O Panneerselvam chuan MLA zingah thlawptu a neih belh zel a, mahse Sasikala-i lamṭangten MLA hi a la ngah zawk tho a ni.

Supreme Court-in hun pek belh a remtih loh avangin nimin khan Sasikala-i chuan Bengaluru jail-a tang turin Chennai aṭangin Bengaluru a pan. A kalchhuah hma hian Marina Beach-ah Jaya-i thlan tlawhin zahna a hlan. Hemi hnu hian police escort-na hnuaiah Bengaluru a pan nghal a ni. Bengaluru jail-ah hian kum 2014 khan Jaya-i nen an lo tang tawh a ni.