Gujarat-a kawngzawhnaah buaina chhuak

Gujarat-a loneitute lungawi lote kawngzawhte chu police-ten hnawhdarh an tum a, kawngzawhtute leh police-te an innawr buai hle.

Loneitute hian Ah­medabad khaw dai, Sanand-a Tata Motors Nano plant bulah lungawi lohna hi an lantir a, thuneituten industry ho tana Narmada dam canal tui pek an tum chu an duh lo a ni.

Police-te hi kawng­zawhte hi hnawh­darh tumin tiang leh tear gas-te an hmang a, kawngzawhte hian lung-in an lo tawng let bawk. Buaina chhuak vang hian police pasa­rih in hliam an tuar.

Ahmedabad Rural District Superintendent of Police R.V. Asari chuan mipuite hi kawng zawh phalna an pek lohthu sawiin, an zawh luih avangin lo dan an tum niin a sawi. An hruaitute an biak laiin pungkhawm zinga ṭhenkhat chuan lungin an lo tawng a, buaina a chhuak zui ta niin a sawi.

State Congress party president Bharatsingh Solanki chuan he thil thleng chung­chang hi February 20 aṭanga ṭan tur, assembly budget session-ah sawichhuah ngei an tum tih a sawi. BJP kaihhruai sorkar chuan an duh dan lo anga awmte cu na takin a bei let zel niin a sawi a, loneitute tana rorelna dik tak thlen tir aiin tharum hmangin a bei let a ni, a ti.