Sorkar laipuiin Mobile app 43 khap belh leh
Sorkar laipui chuan Thawhlehni khan China siam mobile application 43 a khap belh leh a, hei hi India security venthawn thil vang te, ram himna leh inpumkhatna tiderthawng thei nia ngaih vang te a ni tih a sawi.
Sorkar lapuia Ministry of Electronics and Information Technology chuan Information Technology Act hnuaia section 69A hmangin heng mobile app 43-te hi a khap a ni. Ministry of Home Affairs hnuaia Indian Cyber Crime Coordination Center chuan heng mobile app-te a zirchianna hi Ministry of Electronics and Information Technology-ah a report a, hemi hnu hian heng app-te hi khap an ni zui ta a ni.
App 43 khap zinga app pali chu China retail giant, Alibaba Group ta a ni. AliSuppliers Mobile App, Alibaba Workbench, AliExpress - Smarter Shopping, Better Living leh Alipay Cashier-te chu app khap thar zingah hian an tel.
Kumin June 29 khan sorkar laipui chuan China mobile app 59-te chu a lo khap tawh a, September 2 khan mobile app 118 a khap belh leh bawk. Heng app-te hi Information Technology Act hnuaia section 69A tlawhchhan veka khap an ni.