Covid-19 kai Hmuh chhuah tam ber ni a thleng leh

Ministry of Health and Family Welfare-in nimina report a tihchhuahah chuan report an tihchhuah hma darkar 24 chhungin Covid-19 kai hmuh chhuah thar 26,506 an awm a, hei hi  ṭum eng emaw zatna atan ni khata hripui kai hmuh chhuah tam ber ni a ni leh a ni.

Ram pumah hripui kai mi 7,93,802 an awm tawh a, heng zinga 4,95,513 lai chu enkawl dam tawh niin 2,76,685 chuan an la kai mek a, mi 21,604 chuan nimin report tihchhuah thleng khan an thihpui tawh. Darkar 24 chhungin mi 19,135 chu enkawl dam an nih laiin mi 475-in an thihpui leh a, enkawl dam tawh rate hi 62.42% a ni.

Indian Council of Medical Research (ICMR) chuan ni khatah sample 2,83,659 lai an test tih tarlangin hei hi ni khata sample test tam ber ni a ni leh a, hri len ṭantirh aṭanga nimina report an tihchhuah thleng hian sample 1,10,24,491 an test tawh. ICMR hian sample test-na atana laboratory pawmpui 1,169 a nei tawh a, heng zinga 835 hi sorkar laboratory a nih laiin 334 chu private laboratory a ni thung.