Dec-ah Parliament building thar lungphum phum dawn

Parliament building thar sakna tur lungphum chu December thla hian prime minister Narendra Modi-a'n a phum dawn nia sawi a ni. 

Building thar sak a nih dawn avang hian Parliament complex-a lim panga awmte pawh dah sawn lailawk an ni dawn a, heng zingah hian Mahatma Gandhi leh Bhim Rao Ambedkar limte pawh an tel. Project thawh zawh a nih  hunah heng limte hi an awmna ngaiah hian dah leh an ni ang. 

Parliament building thar hi tuna building awmna sa bulah sak a ni dawn a, Central Vista redevelopment project hnuaiah thawh niin, sak ṭan a nih aṭanga thla 21-ah zawhfel hman tum a ni. 

Ruahmanna siamah chuan building tharah hian MP zawng zawngten office hran an nei vek dawn a, heng office-te hi paperless office kalpuina peng pakhat atan digital technology thar hmanga thuam an ni ang. Building tharah hian Constitution Hall siam a ni dawn a, hei bakah hian MP-te tan lounge siamin, library, multiple committee room, dining area leh parking space-te siam a ni dawn bawk. In sak hna hi Tata Projects Limited in a thawk dawn a, cheng vaibel­chhe 861.90 ruahman a ni. 

Tuna Parliament building hman mek hi British rorel laia sak a ni a, Edwin Lutyens leh Herbert Baker-te design  niin, kum 1021 February thlaah a sakna lungphum phum a ni a, kum ruk chhung sak niin cheng nuai 83 an seng.