Modi-a'n Asia rama solar power plant lian ber a hawng

Prime minister Narendra Modi chuan nimin khan Asia rama solar power plant lian ber megawatt 750 pechhuak thei, Rewa Ultra Mega Solar Power Project chu a hawng.

Rewa Ultra Mega Solar Power Project hi Madhya Pradesh-a Rewa district-a awm a ni a, he solar power plant hian solar generating unit pathum neiin unit pakhat hi MW 250 zel pechhuak thei tura duan a ni. Madhya Pradesh Urja Vikas Nigam Limited (MPUVN), Solar Energy Corporation of India (SECI) leh Rewa Ultra Mega Solar Limited (RUMSL)-te chuan he plant siam hna hi an thawk a ni.

Sorkar laipui lam aṭangin he solar power plant siamna hian cheng vaibelchhe 138 chu RUMSL-ah dah luh a ni. He plant aṭanga power siam chhuah 24% chu Delhi Metro Rail Corporation (DMRC) chan tura tih a ni a, a dang la bang 76% hi Madhya Pradesh-a discom-te hnena pek tur a ni thung.