Tamil Nadu CM thar atan Palaniswami la lut

Tamil Nadu Chief Minister thar atan nimin tlai dar 4 khan AIADMK MLA, Edappadi K Palaniswami chu lakluh a ni a, ni 15 chhungin a kaihhruai sorkar chuan thlawptu a ngah tawk em tih House-ah fiah a ni ang.

Chief minister tura beisei, AIADMK general secretary VK Sasikala-i chu a sum lakluh phu loa hausaa puhna thubuaiah Supreme Court-in thiam loh chantir a, kum li tang tura a hrem tak avangin party hruaitu hlun, Palaniswami chuan a ai a awh dawn ta a ni.

Kum 62 mi, Palaniswami hi Tamil Nadu khawthlang lam, Salem-a OBC Gounder hnam a ni a, Jayalalithaa-i zuitu ruh tak niin, kum 2011-2016 chhunga Jaya-in member pali awmna cabinet “Nalvar Ani” a dinah pawh a tel a ni. Kum 1980 chho aṭangin AIADMK hi a zawm a ni. Jaya-i thih hnua an party hotu atana an thlan, Sasikala-i leh acting chief minister O Panneerselvam-te inkara buaina a chhuah hnuah pawh Sasikala-i lamṭang nghet tak a ni.

Tamil Nadu-a rorellai, AIADMK hian MLA 134 a nei mek a, CM thar hi Sasikala-i laka hel, acting CM Panneerselvam tih loh chuan an thlawp vek dawn nia sawi a ni. Palaniswami chuan House-ah fiah tur pawhin an inpeih nghal tih a sawi. Hetih lai hian Panneerselvam chuan AIADMK chu Sasikala-i duhsak zawng leh a chhungten an duh anga an thunun turin an awm tir dawn lo tih a sawi a, an inbeihna chu a la tawp mai dawn lo niin a sawi.