Bengaluru Jail-ah Sasikala-i dah lut

Tamil Nadu-a rorellai, AIADMK hotu lu ber, VK Sasikala-i chu eiruk thubuaia thiam loh chantir a nih hnuin, Nilaini khan kum li tang turin Bengaluru jail-ah dahluh a ni ta.

Sasikala-i hian hun pe rih turin dil mah se Supreme Court chuan a dilna hi hnawlin, thuneitute kuta inpe nghal turin a hriattir a, hei vang hian Nilaini khan Sasikala-i chuan Chennai aṭangin Bengaluru hi a pan nghal a ni.

Kum 61 mi, Sasikala-i hi tan-ina a number chu 9234 niin, midang nen cell an inṭawm a, Nilaini khan a zan hmasa ber chu tan-in chhungah hian hmangin chhuatah a mu a ni. Cell-a a tanpui hi sawilan a ni lo.

Nilaini-a Parappana Agrahara Central Jail-a dah luh a nih hnu hian Sasikala-i chuan diabetes a neih avangin Class I cell pe turin a ngen a, mahse a ngenna hi hnawlsak a ni. Class 1 cell-a tangte hi private television pek an nih bakah, kar khatah ṭum hnih in lam aṭanga ei tur pek phalsak niin, sa pawh an dawng ṭhin a ni.

Sasikala-i chuan Class 1 cell a dil bakah, hmun awl zau zawk pe tur te, a ṭul huna a hriselna dinhmun enfiahtu tur dahsak turtein a ngen a ni. Mahse hengte hi hnawlsak vek a ni a, official chuan Sasikala-i hi a bika enkawlna pek leh duhsak bik a ni dawn lo tih a sawi a, jail inenkawlna dan ang chu a zawm ve mai a ngai dawn a ni, a ti.

Report ṭhenkhat chuan Sasikala-i hi jail chhungah hian bati siam hna thawk tura tih a ni thu an sawi a, mahse official lam chuan an la sawilang lo.

Kum 2014 khan he tan-inah hian Sasikala-i leh Tamil Nadu Chief Minister hlui Jayalalithaa-i te chu kar thum an lo tang tawh a, an pahnih hian kum 1990 chhoa an sum lakluh phu loa hausaa puhna thubuaiah thiam loh chantir an ni.

Jail-a dah luh a nih hma hian Sasikala-i chuan an party-a a dinhmun sawhnghehna turin amah thlawptu rinawm tak, Edappadi K Palaniswami chu chief minister a nih theih nan AIADMK legislature party hruaitu atan a thlang a, kum 2011-a Jaya-in an party aṭanga a lo hnawhchhuah tawh, a vahte pahnihte pawh la lutin chanvo pawimawh tak a chelhtir nghal bawk.