UP police-ten gangster Vikas Dubey an kap hlum

Uttar Pradesh police pariat kaphlumtua puh, gangster Vkas Dubey chu Ningani khan man a ni a, nimin zinga police motor-a Ujjain aṭanga Kanpur panpui a nih laiin a chuanna motor hi a let a, tlanchhuah a tum laiin police-te chuan an kap hlum. 

Vikas Dubey hi man tuma kar khat dawn zawn a nih hnuin Ningani khan Madhya Pradesh-ah man a ni. Nimin zing khan police motor-in Kanpur, Uttar Pradesh lam panpui a ni a, police motor dang pahnihin an zui bawk. Mahse Bhauti area an thlenin Dubey chuanna motor hi a let a, Debey chuan police pakhat silai chu laksakin tlanchhiat a tum a, police dangte chuan hualin inpe turin an ti a, mahse duh loin a silai a hmetpuak a, police-te chuan invenna atan kap letin an kap hlum ta niin Kanpur police thuchhuah chuan a tarlang. Dubey hi damdawiin lamah hruai nghal ni mah se, damdawiin a thlen chuan a thi tawh tia puan a ni. 

Police-ten Dubey an man dan leh, court thlenpui a nih hmaa kahhlum a nih dan hian sawizui a hlawh hle. Dubey man a nih hma lawk hian a ṭhuihruai pahnihte pawh Uttar Pradesh police-te chuan inkahna thlengah an kap hlum tih an lo sawi tawh bawk. 

Dubey hian thubuai tam tak a nei a, heng zingah hian tualthah, mi rukbo leh mi vaua puhna te pawh a tel. Hetih lai hian police leh politician ṭhenkhat nena inzawmna ṭha tak neia puh a ni a, hei vang hian jail pawh a tan loh phah nia sawi a ni. 

UP chief minister hlui, Akhilesh Yadav chuan a twitter-ah Dubey thah a nih hian UP-a BJP sorkar thuruk tam tak a him phah dawn niin a sawi. Politician, police leh sorkar official zinga Dubey nena inhnimhnaihna lo nei tawhte chu hriat theih lohin a awm dawn ta a ni, a ti. Eptu party hrang hrang pawhin Dubey thah a nih danah sorkar chu thuruk a nei ngei nia a lan thu an sawi bawk.