Tun thla chhunga a ṭum 2-na atan LPG cylinder man ti to leh

Eirawngbawlna gas, LPG man chu nimin khan May thla chhunga a ṭum hnihna atan tihto a ni a, bur khat Rs 3.50-a tihto a ni.

International energy rate a san avangin LPG man pawh hi tihto a ni a, bur khat Rs 3.50-a tihto a nih hnu hian Delhi khawpuia non-subsidised LPG cylinder, kg 14.2 chu Rs 1,003-ah a kai chho. Mumbai-ah Rs 1,002,50 niin, Chennai-ah Rs 1,018.50 leh Kolkata-ah Rs 1,029 a ni tawh bawk. State tinin VAT an lak dan azirin rate hi a danglam a ni.

Non-subsisded cooking gas hi consumer-ten kum khata subsidised quota, market rate aia tlawma cylinder 12 an lei hnuah an lei belh hi a ni. Mahse sorkar chuan khawpui tam zawkah LPG subsidy hi a titawp tawh a, Ujjwala scheme hnuaia a thlawna gas connection pekte pawhin non-subsidised rate hian an lei a ni.

March 22 khan LPG cylinder man hi bur khat Rs 50-in tihpun a ni a, May 7-ah Rs 50 bawkin tihpun ani leh bawk. Thla hnih tling loah a man hi ṭum thum tihsan a nihna a ni. April 2021 aṭanga LPG cylinder man punna Rs 193.5 a tling tawh bawk.

Commercial cooking gas chu cylinder khat Rs 8-a tihpun a ni bawk a, kg 19-a rit cylinder chu Delhi-ah Rs 2,354, Kolkata-ah Rs 2,454, Mumbai-ah Rs 2,306 leh Chennai-ah Rs 2,507-ah a kai bawk.

Hetih lai hian ni 43 chhung chu petrol leh diesel man erawh tihdanglam a ni tawh lo. State panga assembly inthlan neih zawh a nih hnuah, March 22 aṭang khan ṭum eng emaw zat fuel man tihsan niin litre khat man sanna hi Rs 10 a tling.