Sakhaw inleh khapna dan siamin Kristiante rilru a ti na - Bengaluru archbishop

Karnataka-a sakhaw inleh khapna, anti-conversion bill chu state governor Thawar Chand Gehlot chuan pawmpuia dan (law)-a chantir a nih hnuah, Bengaluru Archbishop Peter Machado chuan he dan hi a sawisel.

"State sorkarin Kristiante duhdan hnawl a, anti-conversion law a siam hian state puma Kristiante rilru a ti na hle a ni," tiin Archbishop chuan a sawi.

Karnataka-a Kristiante hian thla eng emaw zat chu state sorkar hnenah anti-conversion bill chu ṭul lo leh, hmansual theih a ni tiin an lo sawisel tawh a, dan-a chantir a nih chuan sakhaw dang laka Kristiante enhranna tur a ni, tiin an sawi a ni.

Archbishop chuan an state tana hmasawnna tura kawng hrang hrang, a bikin zirna, healhcare leh sector dangahte theihtawp chhuaha midangte tana an thawh dante an ngaihtuahin, Kristiante chuan phatsan ni angah an inngai a ni, a ti. A hma pawhin Bishop office chuan Governor-in bill hi a pawm a nih chuan a ṭul angin hma an la ve dawn tih a lo sawi tawh bawk.

State sorkar chuan anti-conversion law hi inthlemna, tihluihna, vauna leh thil dang hmanga sakhaw inlehtirna thleng ṭhin venna tur a ni tiin, hetianga sakhaw inlehtirna thleng ṭhin hian khawtlang nun thlengin a tibuai thei niin a sawi. Tihluihna hmanga sakhaw inlehtirtua puhte chu he dan hnuaiah hian kum 3-5 jail tantir leh Rs 25,000 chawi tir theih a ni ang. A ruala sakhaw danga inlette chu kum 10 thleng tan leh, Rs nuai khat chawi tir theih an ni dawn bawk a ni.