SC-in Congress hruaitu kum 1 tang turin hrem

Supreme Court chuan Punjab Congress president hlui, Navjot Singh Sindhu chu kum 30 liam taa intihbuainaa mi pakhat a thih phahna thubuaiah nimin khan hrehawm taka kum khat tang turin a hrem.

Kum 58 mi, cricketer aṭanga politician-a inlet, Sindhu chuan Supreme Court thutlukna hi a pawm thu leh, thuneitute kuta a inpek tur thu a sawi.

Kum 1988, December 27 khan Sidhu hi Patiala-a cheng mi pakhat, Gurnam Singh nen parking spot chungchangah an inhnial a, Sidhu leh a thurualpui Rupinder Singh Sandhu chuan Gurnam Singh hi a car aṭanga hnukchhuahin kut an thlak a a hnuah a thi zui a ni.

Kum 1999 khan Patiala-a sessions court chuan Sidhu-te hian tualthata puh chungchangah finfiahna rintlak a awm lo tia sawiin thiam a chantir a ni. Mahse Gurnam Singh-a chhungte hian petition thehlut lehin, Punjab and Haryana High court chuan kum 2006 khan Sidhu hi kum thum tang turin a hrem. Kum 2018 khan Sidhu hi Supreme Court-ah kalin, court chuan intihbuaina avangin Gurnam Singh hi a thi ni tih finfiahna a awm lo tiin High Court order hi a hnawl a, mahse Sidhu hi senior citizen a tihnat avangin Rs 5,000 chawi turin a ti a ni. Supreme court chuan Sidhu thurualpui Rupinder Sandhu thubuai pawh buaina thlenna hmunah a awm tih finfiahna a awm lo nia sawiin a titawp bawk.

Supreme Court-in thutlukna a siam hnuah, Gurnam Singh chhungte chuan court hnenah a thupek hi ennawn a, Sidhu hi hremna na zawk pe turin an ngen leh a ni. Hei hi Sidhu chhungte pawhin an khing let ve leh a, nimin khan Supreme Court chuan petition hi ngaihtuahin thutlukna hi a siam ta a ni.