AIADMK buaina la tawp lo ; Panneerselvam-a lamin Sasikala leh a chhungte hnawtchhuak

Tamil Nadu Chief Minister thar atan Eddapadi Palaniswami lak luh ni mah se, rorellai AIADMK party chhunga buaina chu a la tawp lo. CM hlui O Panneerselvam-a lamṭangte chuan party-a official team chu bei letin, VK Sasikala-i chu party general secretary aṭangin an ban a, a vahpa TTV Dinakaran pawh deputy general secretary aṭangin an ban nghal bawk.

Party chairman hlui, E Madhusudanan chuan banna thupek hi a tichhuak a ni. Panneerselvam leh Sasikala-i ten chief minister dinhmun an inchuh laiin, Panneerselvam-a lam a thlawp vangin Sasikala-i chuan Madhusudanan hi party-a a nihna chelh aṭangin a lo ban tawh a ni. Mahse Madhusudanan chuan a nihna aṭanga ban turin Sasikala-i chuan thuneihna a nei lo niin a sawi thung.

Nimina thuchhuah an siamah, Madhusudanan chuan Sasikala-i chuan AIADMK party hming a tichhiat avangin hruaitu a nihna aṭanga ban a nih thu a tarlang.

Sakilala leh Dinakaran bakah, S Venkatesh pawh ban a ni tih Madhusudanan a sawi. Venkatesh-a hi Jayalalitha-i thih hnuah AIADMK-ah hian a invawrh lar chho a ni.

Panneerselvam-a chuan CM thar Palaniswami-a kaihhruai sorkar chu paihthlak a tum tih a lo sawi tawh bawk a, sorkar thar chu Sasikala-i leh a chhungte duhdan anga awm tur a nih avangin ṭhiah ngei a ngai dawn a ni, a ti.

CM hlui Panneerselvam chuan amah leh a lamṭangte chuan an state-a constituency awm zawng zawng 234-ah kawngzawh an huaihawt tur thu a sawi a, state mipuite chu AIADMK aṭanga Sasikala-i leh a chhungte paihthlak an nih theih nan leh, Jaya-i in Chennai-a Poes Garden-a Veda Nilayam aṭanga hnawhchhuah an nih theih nana pui turin an sawm dawn tih a sawi.

Supreme Court-in eiruk thubuaiah Sasikala-i thiam loh chantir a, kum li tang tura hremna a tihchhuah hnuah, Sasikala-i hian a hnungzuitu rinawm Edappadi K Palaniswami chu AIADMK legislature party hruaitu atan dahin, Ningani khan CM thar atan lakluh nghal a ni. Governor C Vidyasagar Rao chuan Palaniswami hi ni 15 chhunga a kaihhruai sorkarin thlawptu a ngah tawk leh tawk loh fiah turin a ti bawk. CM rual hian cabinet minister 31-te pawh lakluh nghal an ni. CM thar lakluh lai hi Sasikala-i chuan a tanna, Bengaluru jail-ah TV aṭangin a lo thlir a ni.

Palaniswami hi thla kaw chhunga Tamil Nadu chief minister atana lakluh pathumna a ni. AIADMK hotu hlun ber, Jayalalithaa-i chuan CM hna hi damdawi-ina ni 74 zet enkawl a nih chhung pawh khan a chelh reng a, December 5-a a thih hnu khan a damloh laia a aiawh tura a dah, Panneerselvam chu CM atan lakluh a ni. Panneerselvam hian AIADMK hotu thar, Sasikala-i tana hmun kian turin CM a nihna aṭanga banna a thehlut a, mahse a hnuah Sasikala-i lakah hian a hel zui leh ta a ni. Tamil Nadu mipui leh AIADMK member-te’n an duh a nih chuan CM hna hi chelh chhunzawm zel a duh thu a sawi.