CBI-in Lalu leh a chhungte lakah eiruk thubuai siam thar leh

Ran chaw man tihchingpen thubuaia thiam loh chantir tawh, Bihar chief minister hlui Prasad Lalu Yadav chu bail-a chhuah phalsak a nih hnuah, Central Bureau of Investigation (CBI) chuan a laka eiruk thubuai a siam thar leh.

CBI hian Lalu Yadav hi union railway minister a nih lai, kum 2004 -2009 inkara hna thawktu lak danah thil fel tawk lo awm nia sawi chungchanga thubuai hi a siamsak a ni. Lalu bakah a nupui, Bihar CM hlui ni bawk Rabri Devi; a fanu, Rajya Sabha MP nilai Misa Bharti bakah an chhungkaw member dangte hming pawh thubuai ziahluhah hian tarlan tel an ni. Lalu leh a chhungte hian railway hnuaia hna peknaah thamna, ram leh thil dangte an dawng nia puh a ni.

Nimin khan Patna-a Lalu Yadav chenna in bakah, inzawmna a neihpui nia sawi hmun dang 10 chu CBI team hian a dap nghal bawk.

Kum 73 mi, Rashtriya Janata Dal (RJD) hruaitu Lalu Yadav hi thla hmasa khan Jharkhand High Court chuan Doranda Treasury aṭanga ran chaw man, Rs vbc 139 tihchingpen thubuaiah bail-a chhuah a phalsak a ni. He thubuaiah hian kumin February thla khan CBI special court chuan Yadav hi thiam loh chantirin, kum nga tang turin a hrem a, Rs nuai 60 chawi turin a ti bawk a ni.

Lalu Yadav hi Bihar Chief Minister a nih laia sorkar laipui aṭanga ran chaw man tur sum an dawn tihchingpen chungchangah thubuai pangaah thiam loh chantir a ni tawh.

Nimin zinga Patna-a CBI team-in Yadav chenna in an dap lai hian amah a awm lo a, Delhi-ah a awm tih RJD MLA Dr Mukesh Roshan chuan a sawi a; a fapa, RJD hruaitu Tejashwi pawh a awm lo bawk.

Dr Mukesh Roshan chuan, "Thuneihna changtute chuan Lalu Yadav leh Tejashwi Yadav-te chu mipuiah an tlak nat chhoh zel avangin an bitum a ni," a ti. RJD senior leader Alok Mehta pawhin sorkar lamin eptute che thei loa siam an tumna a ni tiin, an thubuai siam thar chu behchhan mumal nei lo, sorkar lam sawiseltute aw chhuah thei lo tura an beihna a ni, a ti.