Hri kai thar zat tlahniam hret

India ramah Ningani khan Covid-19 hri kai thar mi 2,259 an awm a, a hma ni aiin hri kai zat hi an tlahniam hret.

Ram pumah hri kai hmuh chhuah tawh mi 4,31,31,822 awmin an zinga mi 4,25,92,455 chu an dam leh tawh a, hri kai mek hi nimin zing dar 8-ah khan mi 15,044 an awm.

Covid-19 hri vanga thi hi ram pumah mi 5,24,323 an awm tawh a ni. Ningani-a hripui vanga thi mi 20 zinga 17 chu Kerala state ami niin, Uttar Pradesh state-ah mi pahnih leh Delhi-ah mi pakhatin an thihpui bawk. Hripui vanga thi hi Maharashtra state-ah tam berin mi 1,47,856 in an thihpui tawh a, Kerala-ah 69,440, Karnataka-ah 40,106, Tamil Nadu-ah 38,025, Delhi-ah 26,198, Uttar Pradesh-ah 23,514 leh West Bengal-ah mi 21,203 chu Covid-19 hri vangin an thi tawh a ni.

Hri kai mek hri kai hmuh chhuah tawh aṭangin 0.03% a ni a, hetih lai hian hri kai enkawl dam tawh, recovery rate hi 98.75% a tling tawh thung.

Ni khata hri kai hmuh chhuah thar, daily positivity rate chu 0.50% niin, weekly positivity rate chu 0.53% a ni tih union health ministry data chuan a tarlang.

Sorkar laipui chuan a thlawna pek chhuah turin state/UT hnenah Covid-19 vaccine dose vaibelchhe 193.53 a semchhuak tawh a, heng zingah hian dose vbc 16.72 chu hman lohin an la awm. Union ministry-in a tarlan danin, nimin zing dar 7 thleng khan Covid vaccine hi dose vbc 191.96 pek chhuah a ni tawh a ni.