February 1-ah union budget pharh dawn
Prime minister Narendra Modi kaihhruai, National Democratic Alliance (NDA) sorkar term hnihna hnuaia full budget hmasa ber chu February 1 hian union finance minister Nirmala Sitharaman chuan a pharh dawn.
Kum 2019-a Lok Sabha inthlanpui neih hnuah full budget pharhna hmasa ber tur a ni a, ram economy dinhmunin tlakhniam lam a pan mek lai a nih vangin economy dinhmun tuaitharna turin sorkar chuan hmalakna tur hrang hrang a duan chhuah ngei beisei a ni.
Sorkar laipuiin tunhnaia GDP growth data a tihchhuahah, India GDP chu kum 11 chhunga a tlakhniam lai ber niin 5% chauh a ni pha. Hei hi manufacturing leh contruction sector lam tlakhniam vang nia ngaih a ni.
PM Modi chuan US dollar trillion 5 economy a target thu a lo sawi tawh a, hemi chungchang hi economist, industry hotu, expert, banker leh entrepreneur-te nena meeting an neihnaah pawh a sawi. Modi chuan ram economy thuam
chak dan leh hna tam zawk siam a nih theih dante a sawipui.
Budget pharh hun tur hi Inrinni a ni a, hei hi kum 2015 hnu lama Inrinnia budget pharh a nih lehna hmasa ber tur a ni. Budget session hi thawh hniha neih a ni dawn a, a thawh khatna chu January 31-February 11 chhungin neih a ni ang a, a thawh hnihna chu March 2 - April 3 ah neih chhunzawm a ni ang.