Tamil Nadu CM-in fiahna paltlang

Tamil Nadu Chief Minister thar Edappadi Palaniswani kaihhruai kar kalta Inrinni khan Assembly House-ah fiahna a patlang.

Governor CH Vidyasagar Rao chuan Chief Minister thar atana Palaniswani a lakluh hnuah, a kaih­hruai sorkar chuan thlawptu a ngah tawk em tih fiah turin a ti a ni. Inrinni-a sorkar fiahnaah hian rorellai, AIADMK MLA 135 zinga 122 in Palaniswani hi an thlawp a, AIADMK hotu VK Sasikala-i laka hel, CM hlui O Panneerselvam-a lamṭang MLA 11 an awm thung.

Vote lak hi ban phara neih a ni a, hei hi Panneerselvam lamṭangte chuan an sawisel. MLA-te vote lak hi hriat theih loha tih an rawt a, hei hi eptu party dang­te pawhin an thlawp a ni. Mahse an thil phut hi Spaker P Dhanpaal chuan a hnawlsak. Eptu party, DMK MLA-te chuan House chhungah buaina nasa tak an siam zui a, Speaker dawhkante titluin a mike pawh an tichhia a ni. Hei vang hian vote lak dawnah DMK MLA-te hi House aṭangin hnawhchhuah an ni a, Congress MLA 8 leh IUML MLA pakhat an chhuak tau bawk. House aṭanga hnawhchhuah an nih hnu hian DMK MLA leh MP-te chuan Marina Beach-ah lungawi lohna an lantir zui a ni.

Palaniswani hi kar kalta Ningani khan Tamil Nadu CM thar atan lakluh a ni a, a rualin minister 31 lak luh an ni bawk.

Dravida Munnetra Kazhagam (DMK) chuan sorkar fiah dawna an party MLA-te hnawhchhuah an nih avanga lungawi lohna lantir nan, February 22 khian state chhunga district office hrang hrangah chaw ngheia nawrh huaihawt an tum. DMK hotu Stalin-a chuan House aṭanga an party MLA-te hnawhchhuah an nih hian police-te chuan kut an thlak zui niin a sawi.

Police-te chuan DML MLA-te hi assembly chhunga inkaihhruaina dan zawm lo leh, danin a phut anga phalna la loa nawrh an huaihawt avangin an lakah FIR ziahluh a nih thu an sawi. FIR thehluhah hian Stalin-a bakah, DMK MLA 63, MP pathum leh DMK worker eng emaw zat hming tarlan a ni.

Nimin zing khan DMK chuan party headquarters-ah meeting neiin, sorkar thar fiahna kalpui dan chu dan kalh a nih thu an sawi. Hemi hnu hian party member ṭhenkhat chuan Governor Rao an hmu zui bawk. Party hruaitu Tiruchi Siva chuan Governor hnenah memorandum an thehlut tih sawiin, Governor pawhin an lehkha thehluh chu lo enzui a tiam tih a sawi.