Sorkarin petrol leh diesel-a chhiah lak tihniam ; PMUJ hnuaiah gas cylinder man titlawm

Sorkar laipui chuan Inrinni khan petrol-a excise duty a lak chu litre khatah Rs 8 leh, diesel-ah litre khatah Rs 6-in a tihniam a, hei vang hian petrol litre khat man chu Rs 9.5 leh diesel litre khat man chu Rs 7-in a tlahniam a ni.

Inrinni liam ta khan fuel-a chhiah lak tihhniam a nih thu hi union finance minister Nirmala Sitharaman chuan a twitter kaltlangin a puang a, state sorkar-te pawh an tihdan hi entawn turin a ti nghal bawk.

Finance Minister chuan, "State sorkar zawng zawng, a bikin November 2021-a tihniam ve lote khan, mipuite phurrit tizangkhai tura an tihhniam ve ngei ka beisei a ni," tiin a twitter-ah a tarlang.

Thla li leh a chanve zet fuel man hi khawih chet a nih loh hnuah, state panga assembly inthlan zawh hnu March 22 khan ennawn niin, hemi hnu hian ṭum 14 zet a man hi tihpun a ni hman. A man tihsan a nih hnuhnun ber chu April 6 khan niin, May 21 zing thleng khan tihdanglam a ni zui ta lo. Hemi chhunga petrol leh diesel man punna hi litre khatah Rs 10 a tling chho hman a ni.

Minister chuan fuel-a chhiah lak tihhniam a nih thu a puan rualin, Pradhan Mantri Ujjwala Yojana hnuaiah, beneficiary mi vaibelchhe kua-te tan eirawngbawlna gas cylinder 12 chin chu Rs 200-in tihtlawm a ni dawn tih a sawi nghal bawk.

Rajasthan,Odisha leh Kerala-in VAT tihniam ve nghal
Sorkar laipuiin fuel-a chhiah lak a tihhniam chu entawn ve tura state sorkarte a ngen hnuah, BJP sorkarna state ṭhenkhat chuan petrol leh diesel-a Value added Tax (VAT) an lak chu an tihniam ve nghal.

Rajasthan chief minister Ashok Gehlot chuan VAT an lak hi petrol litre khatah RS 2.48 leh diesel litre khatah Rs 1.16-in a tihniam ve nghal tih a puang a, sorkar laipuiin chhiah a tihhniamnan, an state-a petrol man tihhniamna hi litre khatah Rs 10.48 leh diesel litre khatah Rs 7.16 a tling ta a ni.

Kerala sorkar pawhin VAT hi petrol litre khatah Rs 2.41 leh diesel litre khatah Rs 1.36 in a tihniam ve nghal bawk.

Odisha sorkar chuan sorkar laipui ngenna angin VAT a lak chu petrol litre khatah Rs 2.23 leh diesel litre khatah Rs 1.36-in a tihhniam thu a puang tawh bawk a ni.

Hetih lai hian Tamil Nadu finance minister Palanivel Thiaga chuan sorkar laipuiin state sorkarte VAT tihniam ve nghal tura a phut chu a dik bik lo tih sawiin, a hmaa fuel-a chhiah a tihsan dawn khan state sorkar tumah a rawn lo a ni, a ti. Nikum November thlaa sorkar laipuiin chhiah a tihhniam avang khan an state chuan Rs vbc 1,050 an hloh phah a, tun thlengin hei hian an state sum dinhmunah nghawng a la nei niin a sawi.

Congress-in a chhang let
Congress party chuan sorkar laipuiin fuel chhiah a tihhniam thu a puan hi chhang let nghalin, a tihhniamna hi a la tlem a, mipuite a bumna mai a ni, a ti. Congress party thupuangtu, Randeep Surjewala chuan sorkar laipui hian a hma khan ni 60 chhungin petrol-a excise duty a lak chu Rs 10 in a tipung hman a, tunah mipuite bum kualna atan Rs 9.50 in a tihniam leh a ni, a ti. Kum 2014-a UPA sorkar hunlaia petrol leh diesel-a excise duty lak ang zata tihniam ngam leh tura huaisen turin Finance Minister chu an phut tih an sawi a ni. 

Congress sorkar laia petrol-a excise duty lak chu litre khatah Rs 9.48 niin, tuna BJP sorkarin chhiah a lak chu litre khatah Rs 19.90, diesel chu Congress hun laiin litre khatah excise duty Rs 3.56 lak a nih laiin BJP sorkar hnuaiah hian Rs 15.80 lak a ni, a ti.

Congress hruaitu Jaiveer Shergil pawhin BJP a sorkar hnu, kum riat chhungin petrol-a chhiah lak chu 531% leh, diesel-a chhiah lak chu 206% in a pung a, hemi chhung hian chhiah tihpun aṭangin mipuite sum Rs vbc nuai 26 zet an laksak hman a ni, tiin a sawi bawk.