Tamil Nadu Governor-in Trust vote lak dan report pe turin hriattir
Tamil Nadu Governor Ch Vidyasagar Rao chuan kar kalta Inrinni-a Chief Minister Edappadi K Paniswami fiah a nih ṭuma Assembly House chhunga thil thleng chungchang report pe turin Assembly secretary a hriattir.
Tamil Nadu CM thar hian hneh takin fiahna hi paltlang mah se, sorkar fiah tura vote lak dawn hian eptu pawl, DMK MLA-te chuan buaina an siam avangin Speaker-in House aṭangin a hnawtchhuak a ni. Hemi hnu hian Congress MLA-te chu House aṭangin an chhuak tau ve leh bawk.
CM hlui, Panneerselvam chuan eptu MLA-te House aṭanga hnawhchhuah an nih hnuah sorkar fiahna vote lak a ni tih a sawi a, hei hi democracy kalphung a nih loh thu sawiin a sawisel.
House aṭanga hnawhchhuah an nih hnuah DMK party hian Marina Beach-ah lungawi lohna an lantir zui a, February 22 hian state pumah lungawi lohna lantir nan chaw ngheia nawrh huaihawt an tum bawk. DMK hian nimin khan trust vote lak dawna thil kalpui dan chu a dik lo tiin Madras High Court-ah an zualko.
Governor chuan sorkar fiahna tura assembly inkhawm ṭan hun, chawhma dar 11 aṭanga inkhawm tihtawp hun, chawhnu dar 3.27 inkara House chhunga thil thleng report kimchang leh dik pe turin a hriattir. Report pek rual hian document leh video clip nen pawh titel vek turin a ti a ni.
Hetih lai hian Tamil Nadu Chief Minister thar Paniswami chuan nimin khan hna a thawk ṭan nghal a, a office a luah ṭan hmain CM hlui leh AIADMK hotu hlui, J Jayalalithaa-i thlalak hmaah zahna a hlan phawt a ni.
Chief secretary Girijia Vaidyanathan chuan CM thar hi Secretariat-ah a lo lawm a, Lok Sabha Deputy Speaker M.Thambidurai leh state minister-ten lawmpuina an lo hlan bawk.
CM thar hian nimin khan thupek panga a siam nghal a, hengte hi AIADMK manifesto-ah an lo sawilan tawhte an ni. Hmeichhia hamṭhatna pekna tur scheme pahnih kalpuina turin thupek a siam a, hmeichhe nau paite ṭanpuina tur Rs 12,000 aṭanga Rs 18,000-a tihsanna tur pawh a tifel nghal bawk. Hei bakah hian hmeichhia hnathawkten anmahni hman tura two-wheeler an lei dawn a, 5% or Rs 20,000-a a man tihtlawm sakna tur thupek pawh a ziakfel nghal bawk a ni. State sorkarin ṭhalai hna nei lote tana thla tina unemployment allowance a pek ṭhin pawh a letin a tipung a, sangha mantute tana in 500 sakna turin cheng vaibelchhe 85 a dah bawk.
Palaniswami chuan TASMAC outlet 500 kharna tur thupek a siam bawk a, hengte hi AIADMK-in inthlan dawna a lo tiam tawhte an ni. Nimina chanchin thar lakhawmtute a kawmnaah, CM thar chuan,” Amma (Jay-i) khan thuneihna a chan chhung khan inthlan dawna kan thutiam zinga 11 chu a tipuitling hman a, vawiinah panga kan ti puitling leh thei ta a ni” a ti. Palaniswami chuan a kaihhruai sorkar chu Amma-i sorkar a la ni reng dawn tih sawiin, Jaya-i thlaktu atana an thlan, Chinnamama (Sasikala-i) kaihhruaina hnuaiah sorkar chu a enkawl dawn tih a sawi. An state chuan kum 140 chhunga khaw kheng nasa ber an tuar mek tih sawiin, an ngaih pawimawh leh hna hmasa tur chu mipuite hnena tui thianghlim pek a ni, a ti. Khaw kheng vanga harsatna tawk mek, loneitute chhawmdawlna pek dan tur pawh an puanchhuah thuai tur thu a sawi bawk.