UP inthlan thawh thumnaah vote 61% a tla

Uttar Pradesh assembly inthlan thawh thumna chu Pathianni khan neih a ni a, vote 61% a tla.

Inthlan thawh thumna hi district 12 huam chhunga constituency 69-ah neih a ni a, candidate 826 an awm. Heng bialah hian kum 2012 khan rorellai Samajwadi Party chuan seat 55 a la pha a ni.

Pathianni-a vote tla hian inthlan thawh khatna leh thawh hnihna an pha lo a, inthlan thawh khatnaah khan vote 64.2% leh, thawh hnihnaah 65.5% a tla a ni.

Seat 10 awmna, Kanpur district-ah vote a tla chhe ber a, 56.4% chauh a tla a, state khawpui Lucknow-ah pawh 58.68% chauh a tla a ni.

Uttar Pradesh assembly inthlan hi thawh sariha neih a ni dawn a, a thawh li-na chu February 23 hian neih a ni ang. February 27, March 4 leh 8-ahte vote thlak a ni dawn bawk a, March 11-ah vote tla te hi chhiarin inthlan result hi puan nghal a ni ang.