WHO-in ASHA worker-te Global Health Leaders Award hlan

World Health Organisation (WHO) chuan India rama Accredited Social Health Activist Workers (ASHA) chu health care system lama an hnathawh ṭhat avangin chawimawina, Global Health Leaders Award a hlan.

ASHA (Hindi-a beiseina tihna) hi India rama hmeichhe volunteer maktaduai khat chuang awmna a ni. Khawtlangah health system ṭha taka kalpui a nih theihna kawngah te, thingtlanga cheng mi rethei zawkten health care service ṭha an dawn theihna atante an thawk a, Covid-19 hri leng karah pawh mipuite tan theihtawpin an hna hi an thawk a ni.

Nu, naupai lai leh nau an hrin hnua enkawl zuina te, naupangte hnena hri danna vaccine pek chungchangah te, khawtlang hriselna atan te, TB leh hypertension enkawlna kawngah te, nutrition leh sanitation lamah te,hriselna lama khawsak dan ṭha chungchangahte ASHA hian nasa takin an thawk a ni, tiin WHO chuan a thuchhuahah an tarlang.

WHO chuan Global Health Leaders Award hi mi paruk hnenah a pe a, ASHA bakah he chawimawina dawngtute chu - Afghanistan-a kumin February thlaa firfiakten an kahhlum tak polio worker volunteer pariat, mi retheiten healthcare service an dawn theihna tura hma la tu Dr Paul Farmer, anti-stigma programme kalpuitu Dr Ahmed Hankir, ṭhalaite nungchang siamṭhat ngaite tana sports an tuipui theihna tura hma la tu volleyball player Ludmila Sofia Oliverira Veral leh phar natna umbo leh pharte enhran an nihna nuaibo tuma beitu Yohei Sasakawa-te an ni.

WHO director general Dr Tedros Adhanom Ghebreyesus chuan, "Khawvelin hun harsa leh khirh tak a tawh mek karah, ei leh in lama indaih tawk lohna te, sik leh sa inthlak danglam nasat avanga buaina te, hri leng karahte he award dawngtute hian theitawpin, mahni inphatin midangte tan an thawk a ni," a ti.

Prime minister Narendra Modi leh union health minister Mansukh Mandiviya-te chuan ASHA worker-te chu WHO Global Health Leaders Award an dawn avangin lawmpuina an hlan nghal a, India rama Covid-19 hri leng dona kawngah leh in enkawlna kawngah thawktu pawimawh tak an ni tih an sawi.

PM Modi chuan India ram hrisel zawk dinna tura hmalaknaah ASHA worker-te a hmatawnga awm an ni tiin, an inpekna leh tumruhna chu ngaihsanawm a tih thu sawiin lawmpuina a hlan.