Rel-ah senior citizen-te ticket man tihtlawm sak leh turin ngen

Communist Party of India-Marxist (CPI-M) MP Binoy Viswam chuan union railway minister Ashwini Vaishnaw hnenah, India rama Covid-19 hri a len hnua senior citizen-te tana rel chuan man tihtlawm sakna tihtawp a nih chu hmang chhunzawm leh tawh turin a ngen.

Union Minister hnenah lehkha a thawn a, CPI-M MP chuan railway ministry-in senior citizen-te concession a tihtawp hi ram chhunga kum upa zawk mi vaibelchhe telin an tuar phah a ni, a ti.

'Covid-19 hri leng vangin he thutlukna hi siam a ni a, mahse hri leng a ziaawm a, nunphung a pangngai chhoh hnuah senior citizen-ten vawi tam tak ennawn tawh tura an ngen hnuah pawh tun thlengin ennawn a la ni leh lo," tiin Binoy Viswam chuan a sawi.

Viswam chuan Indian Railways chu India ram mipui, rel hmanga an teivelna man tlawm leh rintlak zawk pekna tura siam a ni a, category hrang hrang siamin, senior citizen-te tan man tlawm zawka rel hmanga an zin theihna tur ruahmanna pawh a siam a ni, a ti. Kum 2020, March thla aṭanga senoir citizen-te concession tihtawp a ni hian mi vaibelchhe sarih chuang zet a nghawng pha tih a sawi bawk. Concession titawp a nih hma hian senior citizen, hmeichhia kum 58 chin leh mipa kum 60 chinte chuan rel chuanna man hi hmeichhe tan 50% leh mipa tan 40% a tlawmin an la thei a ni.