India-in ralthuam lei hnem

Khawvel ram hrang hrang zingah India chu kum nga chhunga ram dang aṭanga ralthuam lei hnem ber a ni.

Stockholm International Peace Research Institute (SIPRI) report thar berin a tarlan danin, India hian kum 2012-16 inkar chhung khan ram hrang hrangten ramdang aṭanga ralthuam an lakluh zinga 13% a la lut pha a ni.

China chuan ramdang aṭanga ralthuam lakluh tihtlem a nih theih nan ramchhunga siam a uar chho a, mahse India chuan Russia, US, Europe, Israel leh South Korea ralthuam siamte a la lut nasa hle.

Kum nga kalta chhung khan khawvel pum huapin ralthuam lak luh a pung hle a, Cold War hnua ralthuam lei tam ber ṭum a ni a, a bikin Middle East leh Asia ramten an lei nasa hle a ni.

Saudi Arabia chu kum 2012-16 chhunga ral­thuam leitu ram lian pahnina a ni a, kum 2007-11 aiin a ralthuam lakluh zat chu 212% zetin a pung a, Qatar pawhin ralthuam a lei zat hi a hma kum nga aiin 245% in a tipung bawk.

Ralthuam thawnchhuaktu zingah kum nga kalta chhungin US a sang ber a, hemi chhunga ram hrang hranga ralthuam hralhchhuah zinga hmun thuma ṭhena hmun khat chu US siam a ni a, kum 2007-11 aiin a thawnchhuah zat hi 21% zetin a pung. US ralthuam thawnchhuah zinga a zahve dawn chu Middle East ram hnena a hralh a ni. Russia pawhin ralthuam hi 23% zet a thawnchhuak a, a ralthuam hralhchhuah zinga 70% chu India, Vietnam, China leh Algeria-te’n an lei. China pawhin hma a sawn a, ralthuam a thawn chhuah zat hi kum 2012-16 chhung khan a hma kum nga kaltaa 3.8% chu 6.2% ah a pung hman a ni.

India leh Russia-in sipaite hman tur KA-226T Helicopter an siam tur chu kum 2019 khian sipaite kuta pek hman beisei a ni. Nikum October thla khan India leh Russia chuan KA-226T Helicopter 200 siam dun turin inremna an lo ziak tawh a ni. Helicopter 60 chu siam zawh felin rawn thawn a ni ang a, a bak 140 chu India ramah siam chhunzawm leh remkhawm a ni ang.