Telangana CM-in Temple-ah Rs vbch 5 man rangkachak pe

Telangana Chief Minister K Chandrasekhar Rao chuan nimin khan Tirumala Tirupati temple-ah rangkachak, cheng vaibelchhe 5 hu a hlan.

Andhra Pradesh leh Telangana state ṭhendarh a nih hnua a ṭum hnihna atan nimin khan Andhra Pradesh hi a tlawh a, temple-ah hian Telangana sorkar hmingin thilpek hi a hlan a ni. Hetih lai hian mi tam tak chuan mipuite sum thawhkhawm hmanga CM-in thilpek tam tham tak a pechhuak chu an sawisel.

Temple-a Lord Venkateshwara Swamy tana rangkachak, cheng vaibelchhe 5 chuang a hlan bakah, CM hian pathian dangte tan cheng nuai 59 a hlan tel bawk. Temple-ah hian CM hi a nupuiin a ṭawiawm a ni.

Rao hian Telangana state hran din a nih chuan pathian hrang hrangte hnenah thilpek hlan a lo tiam tawh a, kum 2014 khan Andhra Pradesh aṭangin Telangana state hi din a ni.

Nikum October thla khan CM Rao hian rangkachak lallukhum, kg 11.7-a rit chu Warangal-a pathiannu, Goddess Bhadrakali tan a lo hlan tawh a, hei hi cheng vaibelchhe 3.5 hu a ni. Rao hian Warangal-a Veerabhadra Swamy temple pawh tlawh leh thuai a, thilpek hlan a tum.

Eptute chuan CM thiltih hi sawiselin, a mimal thutiam tihhlawhtlin nana mipuite thawhkhawm, state sum a hmang vak chu ṭha an tih loh thu an sawi. Congress party thupuangtu, Madhu Yashki Goud chuan sorkar sum dik lo taka hman a ni tiin, CM lakah complaint thehluh an tum tih a sawi.

Hetih lai hian Telangana-ah chuan ṭhalai hna nei lote tana hna siamsak phutin Telangana Joint Action Committee (TJAC) chuan state khawpui, Hyderabad-a Indira Park area-ah Unemployed Protest Rally an huaihawt. Rally huaihawt hi city police-te’n an remtih lo a, mahse committee chuan CM Rao-a kaihhruai sorkar hlawhchham zia lantir nan kawngzawh hi an huaihawt tih an sawi. Police-te chuan TJAC chairman Professor M Kodandaram leh activist eng emaw zat an man.