Hyderabad-a godown kangah mi paruk thi

Hyderabad-a Attapur bialah nimin khan air cooler godown-ah kangmei nasa tak a chhuak a, hnathawktu mi paruk an kang hlum.

Police team chuan zing dar 5 velah kangmei chhuak hi an hmu a, Fire department an hriattir nghal a ni. Deputy Commissioner of Police (Shamshabad Zone) P V Padmaja chuan kangmei hi a kai chak hle tih a sawi a, kangṭhelh motor pali hmangin an ṭhelh a, mi paruk kang hlumte ruang chu Osmania General Hospital-ah post mortem tura lak nghal an ni, a ti.

Kangmei chhuahna hmunah hian hnathawktu pali dah an ni ṭhin a, mahse chhiatna a thlen zan hian mi dang pahnih an awm belh a ni. DCP chuan godown neitute chu man an ni tawh tih a sawi a, kangmei chhuah chhan pawh chhui chian mek a nih thu a sawi.

Nimin vek khan Kerala-a Kozhilode-ah gas cylinder puakin kangmei a chhuak zui a, dawr 10 a kang ral vek. Kangmei chhuahna hi SM street (Mithayai Theru) -a Modern Textile dawrah a ni a, kangṭhelh motor pasarih hmangin ṭhelh a ni.