Delhi-a Ramjas College kawtah zirlai pawl hnih intibuai

Delhi University-a Ramjas College-ah nimin khan Jawaharlal Nehru University (JNU) zirlai Uma Khalid thu sawi tura sawmna cancel chungchangah zirlai pawl pahnih an intibuai.

JNU zirlai panga, ram phatsan zawnga thu sawia puh zinga mi, Umar Khalid hi Ramjas College-a ‘culture of protest’ session-ah thu sawi tura sawm a ni a, mahse sawmna hi cancel anih tak tak avangin zirlaite inkarah buaina hi a chhuak ta a ni. He seminar hi Ramjas college-a Literary Society, Wordcraft-in a buatsaih a ni. Khalid hi a PhD subject, ‘The War in Adivasi areas’ tih sawi tura sawm a ni.

Thawhlehni khan Rashtriya Swayamsevak Sangh (RSS) zirlai pawl, BJP nena inzawmna ṭha tak nei, Akhil Bharatiya Vidyarthi Parishad (ABVP) chuan thu sawi tura Khalid sawm a ni hi duh loin, ram phatsantu a ni tiin college pawn lamah an duh loh thu an lo aupui tawh a ni. ABVP member-te hian lung-in college an tawng a, seminar room kalhin power lakna pawh a tichhia niin an sawi. He thil thlen hnu hian college chuan Umer Khalid leh JNU zirlai dang, Shehla Rashid-te thu sawi tura sawmna chu a cancel ta a ni.

Umer Khalid-a sawmna tihtawp a nih leh avang hian nimin khan zirlai pawl dang, All India Students’ Association (AISA) chuan lungawi lohna an lantir ve leh thung a, ABVP member-te nen an intibuai zui ta a ni.

Zirlai nawrh huaihawtte hi Delhi police-te nen pawh an innawrh buai bawk a, police-te chetdan chu activist leh Swaraj India party dintu, Yogendra Yadav chu na takin a sawisel a, police-te hian an intibuai a, kutte an inthlak laiin an lo thlir mai mai niin an sawi.