Rs 1,000 note thar tihchhuah tum lo : Shaktikanta Das

Economic Affairs Secretary Shaktikanta Das chuan sorkarin Rs 1,000 note thar tihchhuah a tum lo tih a sawi.

Report ṭhenkhat chuan sorkarin Rs 1,000 note a tichhuak thar leh thuai dawn niin an tarlang a, hei hi Das chuan a twitter-ah nimin khan a chhang a ni.

Das chuan Rs 1,000 note thar ti­chhuak loin, sorkar chuan Rs 500 note bakah, pawisa note te zawkte tam zawk siamchhuah tum a ni, a ti. Bank aṭanga sum lakchhuah chungchang pawh ngun taka an enfiah zel thu sawiin, midangte harsatna a thlen theih avangin mipuite chu an mamawh bak sum lachhuak lo turin a ngen.

Nikum November 8-a pawisa note lian pahnih, Rs 500 leh Rs 1,000 note tih thih a nih hnu khan mipuiten bank aṭanga sum an lakchhuah theih zat hi bithliah a ni a, duh ang zat lakchhuah theih a nih loh avangin pawisa note indaih lohna hi ala reh thei lo.

Hetih lai hian Central Board of Direct Taxes (CBDT) chuan pawisa note tih thih a nih hnuah account-a sum dah luh, cheng nuai nga chin chunglamte chu enfiah mek a nih thu a sawi. Electronic verification awm loin mi nuai 18 chuan an bank account-ah cheng nuai nga chuang an dah lut a ni.