CAA vanga lawm-thu sawina lehkha-thawn tlangzarh

Union home minister Amit Shah chuan kar liam ta Inrinni khan Citizen­ship (Amendment) Act (CAA) siam vanga prime minister Narendra Modi hnena lawmthu hrilhna nia sawi, Ahme­dabad-a chengte'n postcard nuai 5.5 an thawn chu a tlangzarh. 

Postcard hi BJP worker-te inhmuh­khawmnaah tlangzarh a ni. State BJP chuan CAA thlawpna lantira awareness campaign an kalpui chu Limca Book of Records leh World Record of India-ah a lang pha niin a sawi. 

Shah chuan CAA chu inthlan dawna an manifesto-ah pawh an lo tiam tawh tih sawiin, khatih laia an dodal loh chhan eptu party-te a zawt let. CAA siam a nih tak vangin, PM Narendra Modi chuan mi nuai telte hnenah an dikna chanvo a pe dawn a ni, a ti. 

"India ram Prime Minsiter hmasa ber aṭanga Home Minister hmasa ber, President hmasa ber leh Mahatma Gandhi ngei pawh khan Pakistan ram aṭanga India rama rawn lutte chu khua leh tui nihna pek an ni ang, tih an lo sawi tawh a ni,"  tiin Amit Shah chuan Pakistan ram aṭanga Hindu, Sikh, Buddist leh Jain rawn lutte chuan kalna tur dang an nei chuang lo a ni, a ti.