Sasikala-in Jaya-i piancham ropui taka lawm turin ngen

Bengaluru jail-a tang mek, Tamil Nadu-a rorellai AIADMK hotu MK Sasikala-i chuan an party hruaitu hlui leh chief minister hlui ni bawk, J Jayalalithaa-i piancham chu ropui taka lawm turin an party mite a ngen. Vawiin hi Jaya-i piancham a ni.

Sasikala-i chuan Jaya-i dam laia a piancham lawmpui an phurṭhin zia sawiin, kuminah amah awm tawh lo mah se a thalak hmaah pangpar hlan turte, an party chhunga harsatna awm mekte chinfel a ni theih nana dil tur te, AIADMK sorkar chuan mipuite tan rawng a bawl chhunzawm zel theih nante dil turin a ngen.

February 14 khan Supreme Court chuan Sasikala-i hi a sum lak luh phu loa hausaa puhna thubuaiah thiam loh chantirin, kum li tang turin a hrem a ni. A rual hian a chhungte pahnih, J Ilavarasi leh V N Sudhakaran-te pawh hrem tel nghal an ni.

Kum 33 dawn a hnung a lo zui tawh, Jaya-i piancham lo thleng­ah amah ber a tel ve thei ta lo chuan a tihrehawm hle tih Sasikala-i chuan a sawi a, “Ka rilruah a cham reng a ni. Mipui­te hruaitu ṭha tak a ni a, reilote chauh hmute pawhin an theihnghilh thei lo” tiin a hnathawh bakah, a mizia chuan mite ngaihnat a hlawh phah hle tih a sawi.

Hetihlai hian jail-a tantir a nih dawna Sasikala-i’n an party deputy general atana a dah, TTV Dinakaran chuan nimin khan AIADMK-a chanvo thar hi a chelh ṭan. Jayalalithaa-i khan Dinakaran hi an partyaṭangin a lo hnawtchhuak tawh a, mahse Sasikala-i hian jail-a atan hmain party-ah a lakluh bakah, chanvo pawimawh tak hi a pe zui ghal a ni. A rual hian a vahpa dang, S Venkatesh pawh party-ah a la lut tel bawk.

Sasikala-i chuan a vahte pahnih chuan an thil lo tih tawh avanga an inchhir thu leh, ngaihdam pawh ziak ngeia an dil thu a sawi a, party-a la lut leh tura an ngenna angin a la lut ta niin a sawi.

Bengaluru jail-a a tannaah Sasikala-i hi duhsak bik a ni lo a, tang dangte ang bawka enkawl niin a cell pawh midang nen an inṭawm a ni. Mahse kum 61 mi, Sasikala hian a hriselna ṭhat tawk loh avangin enkawlan ṭha zawk pek a beisei tih a sawi. AIADMK secretary V Pugazhendi chuan Chinamma (Sasikala) hi a chak lo hle a, awmna ṭha zawk pe turin a ngen a, jail thuneituten an pek ngei pawh an beisei tih a sawi a ni.