Shivaji lim din turah Mumbai inlungrual lo

Khawvela milim sang ber tur chu Mumbai-ah din a ni dawn a, nikum December thla khan Prim Minister Narendra Modi chuan lungphum a lo phum tawh a ni.

Mumbai tuipui kamah hian kum zabi 17 hunlaia Hindu pasalṭha, Chhatrapati Shivaji lim chu din tum a ni. He lim hi metre 190-a sanga siam tum a ni a, America-a Statue of Liberty let zeta sang niin, khawvela milim sang ber ni mek, China-a Budda lim aiin meter 40-in a sang dawn bawk. Mi lim siamna senso atan hian cheng vaibelchhe 3,600 ruahman a ni.

Hetih lai hian Mumbai-a Koli sangha mantu hnamte chuan tuipui kam hla lo tea milim din tum hian an eizawnna thlengin a nghawng chhe thei dawn nia sawiin an duh lo thung. Koli hnam hi Mumbai luahtu hmasa an ni a, an pathiannu “Mumbadevi” pawh Mumbai khaw hming atan puttir a ni.

Mi lim din tum chungchangah hian Mumbai-a chengte ngaihdan a in ang lo hle. A duhtu lam chuan tualchhung miten Maharastra pasalṭha anga an chhal, Shivaji lim din chu thil tihawm tak nia an ngaih thu an sawi. Mahse sawiseltu lam chuan sum khawhralna ho tak nia an ngaih thu an sawi a, milim siamna atana sum sen tur chu mi maktaduai 20 chuang chenna, khawpui chhunga infrastructure, health leh education lam tihhmasawnna atana hman an duh zawk tih an sawi.