Punjab CM-in eiruknaa inhnamhnawih Health Minister a ban " Eirukna hi eng kawng mahin kan ngaizam dawn lo"

Punjab chief minister Bhagwant Mann chuan eiruknaa inhnamhnawiha puh, a health minister Vijay Singla chu nimin khan a ban.

Vijay Singla hi tender pekchhuahah 1% commission a phut zel nia puh a ni a, he puhna hi a dik ngei a ni tih finfiahna rintlak tak a awm hnuah CM chuan minister a nihna aṭang hian a ban zui nghal a ni. Hei hi ram chhungah CM-in a cabinet minister lakah hetiang zawnga action a lak ṭum hnihna a ni a, kum 2015 khan Aam Aadmi Party (AAP) convenor leh Delhi chief minister Arvind Kejriwal chuan a minister pakhat eirua puh chu a lo ban tawh bawk a ni.

Minister a ban hnua thu a sawiah, CM Mann chuan, "Eirukna thil hi 1% lek pawh ni se kan ngaizam dawn lo," tiin, "Mipuite chuan AAP sorkarah chuan beiseina sang tak an nei a, an beiseina ang chuan kan awm dawn a ni. Mother India hian fapa, Arvind Kejriwal leh sipai Bhagwant Mann a neih chhung chuan, eirukna do hna hi kalpui a ni zel dawn a ni," a ti. Singla pawh hian a tih dik loh chu a pawm tih a sawi bawk.

Singla hi eiruk vanga minister aṭanga ban a nih hnuah Punjab police anti-corruption branch chuan an man nghal a, eiruk thubuai pawh an siamsak nghal a ni.

CM Mann thutlukna siam hi AAP convenor Arvind Kejriwal chuan fakin, eirukna do tura huaisen taka thutlukna a siam chuan a rilru a hneh hle a, a lung pawh a tichhe hial zawk niin a sawi. Ram pum pawhin AAP chu an chhuang hle a ni, a ti. AAP MP Raghav Chadha pawhin an party chauh chu party hruaitu, ti dik lote chunga action la ngam khawpa huaisen niin a sawi bawk.