J&K police medal-a Sheikh Abdullah lem thlak dawn

Jammu and Kashmir Lt Governor kaihhruai rorelna chuan Jammu and Kahsmir Police medal-a National Conference founder leh J&K chief minister hlui Sheikh Abdullah lem dah chu thlakin, a aiah India national emblem dah an rel.

J&K financial commissioner leh additional chief secretary Raj Kumar Goyal chuan thuchhuah siamin, " Jammu and Kashmir Police Medal Scheme Para 4 chu siamṭhain, medal hmai pakhata Sher-i-Kashmir Sheikh Mohammad Abdullah lem dah chu 'The National Emblem of the Government of India’ in thlak a ni ang a. A hmai lehlamah J&K State Emblem dahin, an medal dawn azirin 'Jammu and Kashmir Police Medal for Gallantry' leh 'Jammu and Kashmir Police Medal for Meritorious Service’ tih ziah a ni bawk ang," a ti.

Police medal hi kum 2001 khan siam niin, Kumthar Ni, Republic Day leh Independence Day-ahte category pahnih - huaisen leh hnathawh ṭhat lamah te pek an ni ṭhin.

Kumin January thla khan J&K sorkar chuan 'Sher-i-Kashmir Police Medals' tih ṭhin chu 'Jammu and Kashmir Police Medals' tiin a lo thlak tawh bawk.

Kum 2019, August 5-a central-a BJP sorkarin Jammu and Kashmir tana special status pekna, Article 370 leh 35A titawp a, J&K state chu union territory pahniha a ṭhen hnu khan, J&K sorkar chuan Sheikh Mohammad Abdullah piancham, Sher-i-Kashmir tih bawk state holiday-a a lo puan chu a tihtawp sak tawh bawk.

National Conference (NC) thupuangtu Imran Nabi Dar chuan police medal aṭanga Sheik Abdullah lem thlak a ni tur chu J&K chanchin leh an nihna nuaibo tumna tiin a sawisel. "J&K mipuite chuan tuna an dinhmun thleng tur hian kawng hrang hrangin harsatna an lo tuar chhuak tawh a ni. Theihtawpin rahbeh a nihnate an bei let a, an thil tawn leh chanchinte hi thlak danglam theih a ni lo a, hming thlak ringawtte hian engmah a ti danglam lo," a ti.