PM Modi leh US President Biden-te inbia

Japan rama Quad meeting hmanga zin, prime minister Narendra Modi chu nimin khan meeting kar lakah US president Joe Biden nen an inbia.

PM Modi chuan US-India thawhdunna chu inrintawnna nena thawhdunna a ni, a ti. Ram pahnih mipui pawhin inzawmnna ṭha tak neiin, economy lama an thawhdunna ṭha chu India-US partnership danglamna a nih thu a sawi. Thawhṭannia inremna an ziah, US Investment Incentive Agreement chuan ram pahnihah hian investment lama hmasawnna nasa tak a thlen ngei dawn tih a sawi bawk.

US President Biden pawhin India leh US chuan thawhdunna leh tih tur tam tak an neih thu leh, US-India partnership chu khawvela thawhdunna ṭha ber zingah siam ngei a tum tih a sawi. Russia-Ukraine indona thleng mekin khawvela nghawng ṭha lo a neih chungchangah pawh siamṭhat dan ngaihtuahin an inberawn zel dawn a ni, a ti.

Quad /Quadrilateral Security Dialogue-ah hian ram pali - India, US, Japan leh Australia an tel a ni. Meeting-ah hian Modi leh Biden-te bakah Japan prime minister Fumio Kishida leh Australia prime minister Antony Albanese-te an tel.

PM Modi hian a hmain Japan PM Kishisda leh Australia PM thar Albanese-te hi a hian meeting a lo neihpui tawh bawk.