Acid factory gas leak vangin mi pasarih thi

Uttar Pradesh-a Sitapur district-ah nimin khan acid siamna factory aṭanga gas hlauhawm tak leak vangin mi pasarih an thi a, an zinga pathum chu naupang an ni. 

Sitapur district magistrate Akhilesh Tiwari chuan he chhiatna thlenna hi Biswan police station area hnuai Jalalpur khuaah a nih thu a sawi a, thi zinga mi panga chu chhungkaw khat ami an ni tih a sawi. 

Chief minister Yogi Adityanath chuan chhiatna thleng vanga nunna chan an awm chu pawi a tih thu sawiin,  district thuneitute  hnenah gas leak-na factory bul hnaia awmte chu hmun him lama sawn turin a ti. He chhiatna thlenga mawhphurtute pawh zawngchhuak a, hremna pe turin official-te a hrilh bawk. 

Biswa Sub Divisional Magistrate (SDM), Suresh Kumar chuan thil thlen dan chhui chiang turin thupek tihchhuah a ni tawh tih sawiin, expert team pawhin factory awmna hmun hi an tlawh nghal tih a sawi.