UP inthlanah vote 61% a tla

Uttar Pradesh assembly inthlan thawh li-na chu Ningani khan constituency 53-ah neih a ni a, hriat theih chinah vote tla hi 61% a tling.

UP Chief Electoral Officer chuan district 12 chhunga assembly bial 53-ah inthlan hi tluang taka neih a nih thu a sawi. Hmun ṭhenkhat aṭangin vote tlak dan report kimchang a la lut lo a, hei vang hian vote tla zat pawh hi a la pun chhoh a, 63% a tlin phak a rin thu a sawi.

Hmun tam zawkah boruak ṭha tak hnuaiah vote thlak a ni a, Mahoba bialah erawh chuan pawl pahnih inkarah buaina chhuakin mi pathumin hliam an tuar. SP candidate Sidhhgopal Sahu-a fapa, Saket Sahu-a motor leh, BSP candidate Arimardan Singh-a fapa Himachal Singh-a te motor a insut vangin buaina hi a chhuak a, silai pawh hmehpuah nia sawi a ni. He thil thleng vang hian FIR thehluh a ni tawh a, mi pahnih an man tawh bawk.

Assembly bial 53-ah hian candidate 680 an awm a, an zingah hmeichhia 61 an tel. Kum 2012 inthlanah khan heng bial aṭang hian Samajwadi Party chuan seat 24 a la a, BSP-in 15, Congress paruk, BJP panga leh party dangten seat thum an la a ni.

Kumin assembly inthlanah hian rorellai, SP leh Congress party an thawkdun a, seat 53-ah hian SP chuan candidate 30 siamin, Congress-in seat 25-ah a chuh bawk. Party pahnihte hian seat pahnihah candidate hran an nei a ni. BSP chuan seat 53 ah candidate a siam vek a, BJP-in seat 48-ah chuhin a thawhpui Apana Dal tan seat ruk a kian.