Exam zawhna putru vangin board chairman man
Bihar Staff Selection Commission (BSSC) chairman, Sudhir Kumar chu question paper putruk vangin man a ni.
Police-te chuan 1987 batch IAS officer, Kumar bakah a chhungte pali pawh an hreng nia sawi a ni a, Patna panpui a nih theih nan nimin khan Hazaribagh court-ah hruai a ni.
BSSC in panchayat secretary, revenue worker leh clerk tur mi 17,000 lakna exam a buatsaiha question paper-te chu a putru a ni. Heng exam zawhna hi exam thawh hnih, January 29 leh February 5-a buatsaih a nih hnuah a putru tih hriatchhuah a ni a, hei vang hian exam neih tawh pawh hi sorkarin a cancel a ni.
Police-te chuan BSSC chairman Kumar hi February 13 khan thu an lo zawt fiah tawh a, a chhanna pek danah an lungawi tawk loh avangin a tukah zawhnna chhan tur eng emaw zat an pe leh a ni.
Patna police-te chuan exam zawhna chhutna hmun, Confisec Printers neitu Vinit Kumar Agarwal leh an manager AjayKumar-te chu Nilaini khan an lo man tawh bawk a, Patna-a lak an dil mek.
Exam zawhna putruk chungchangah printing press hi a mawhphurtu ber a nih theih thu police-te chuan an sawi a, hei bakah hian politician pawimawh tak takte pawh an inrawlh rin a ni bawk. BSSC official-te chuan hna lak tur chungchangah hian politician lam aṭanga nawrna a tam a, phone call pawh an dawng fo tih an lo awi tawh a ni.
Special Investigation Team (SIT) chuan he thil thlenga inhnamhnawiha puh mi 30 dawn an man tawh bawk a, an zingah hian BSSC secretary Parmeshwar Ram leh computer operator-te pawh an tel.