Freedom 251 siamtu man

Noida-a Ringing Bells company director Mohit Goel chu mi buma puhin Ningani khan Ghaziabad-ah man a ni. Ringing Bells hian nikum khan smartphone, Freedom 251 chu Rs 251 leka hralhchhuah theih turin a siam a ni.

Ghaziabad-a Ayam Enterprises chuan Goel-a lakah hian FIR thehlutin, Ringing Bells hian a bum a, cheng nuai 16 zet an hloh phah niin a sawi. FIR thehluh a nih vang hian Goel hi thu zawhfiah turin man a ni tih Ghaziabad DeputySP Manish Mishra chuan a sawi.

FIR-ah hian Ayam Enterprises chuan Goel leh Ringing Bells-a official dangte chuan kum 2015, November thla khan Freedom 251 phone distributor ni tur hian an sawm a, RTGS kaltlangin Ringing Bells hnenah hian cheng nuai 30 an pe tih a sawi. Mahse an thil siam an pekchhuah hi cheng nuai 13 chuang awrh man chauh a tling tih a sawi. A bak cheng nuai 16 chu a pawisa emaw, a bungrua ang zawnga pe tura an ngen pawhin an lo vau let zawk niin an tarlang.

Ringing Bells hian nikum February thla khan an website kaltlangin khawvela smartphone man tlawm ber, Freedom 251 hi an hralhchhuak a ni. Phone hralhchhuah a nih dawn hian mi 30,000 in an book a, an website-a pawh mi vaibelchhe sarih an in register hman a ni. Hetih lai hian hetianga tlawma smartphone an hralhchhuah hi mipuite bum tumna nia sawiselna pawh a tam hle.