Jats-in Haryana-ah Black Day hmang

Haryana-a Jats hnamten, sorkar hna leh zirna-ina an hnam puala quota dah phuta nawrh an huaihawtna kal zelah, nimin khan Haryana state pumah Black Day an hmang.

Jats hnam hian sorkara an thil phut nawrna atan hian nimin khan turban, lukhum, ribbon leh ban hren dumte an inbel vek niin, All India Jat Aarakshan Sangharsh Samiti (AIJASS) president Yashpal Malik chuan a sawi. Sorkar pawhin an thil phut ngaihtuah tur hian high-level committee a din tawh bawk.

Malik-a chuan March 1 aṭangin sorkar chu an thawhpui tawh dawn lo tih a sawi a, Jats hnam chuan power leh tui bill-te an pe tawh dawn lo a, sorkar aṭanga loan an lak pawh an rul tawh dawn lo tih a sawi.

March 2 hian Delhi leh Uttar Pradesh-a Jats hnam awmte pawhin Delhi-ah nawrh huaihawt an tum a, quota an phut chung­changah President hnenah memorandum an thehlut bawk ang. Jats-te hian Parliament hual an tum bawk a, a hun tur erawh chu March 2 hian an la rel chawp dawn a ni.

Malik-a chuan an thil phut chu midang pawhin an thlawp niin a sawi. Other Backward Classes category hnuaiah zirna in leh sorkar hnaa quota dahsak an phut bakah, nikuma nawrh an huaihawt ṭum mante chu chhuah tur te, thubuai siamsakte pawh hnuhkir sak tur leh, buaina chhuak vanga thi chhungte leh hliam tuarte chu zángna­dawmna pe tur tein an phut.