UP-ah inthlan thawh nga-na nei

Uttar Pradesh inthlan thawh nga-na chu nimin khan district 10 huam chhunga constituency 51-ah neih a ni.

Assembly bial 51-ah hian candidate 617 an awm a, an zingah hian hmeichhia 43 an tel. Vote nei mi vaibelchhe 1.84 chuang an awm a, mipa nuai 99.50 leh hmeichhia nuai 85 an awm a ni.

Association for Democratic Reforms (ADR)-in a tarlan danin candidate zingah 19% chu criminal record nei lai an ni a, Bahujan Samaj Party (BSP)-in thubuai nei lai hi an ngah ber a ni.

Kum 2012 assembly inthlanah khan rorellai Samajwadi Party chuan, heng district 10 huam chhunga constituency 51-ah hian seat 51 zinga seat 37 an la a, BSP -in seat thum lain, BJP-in panga, Congress-in panga leh Peace Party-in seat hnih an la ve bawk.

Candidate 617 zingah mi 285 chu gra­duate niin, ziak leh chhiar thiam lo mi pakua an awm. BSP candidate 43-te chu mi hausa tawntaw an ni a, BJP candidate 88, SP 32 leh Congress candidate pasarih chu millionaire niin, Independent candidate zingah millionaire 14 an awm bawk a ni.

Inthlan thawh nga atan hian polling centre 12,555 leh polling booth 18,822 siam a ni a, inthlanna felfai tak a awm theihna atan venhim hna thawk turin police leh security force-te dah an ni bakah, sector magistrate 1,442, zonal magistrate 180 leh static magistrate 170 dah an ni bawk. Mehdawal bial chu vote nei tamna ber bial niin voter 4,38,106 an awm a, a tlemna ber Tanta bialah chuan voter 3,04,934 an awm. Amethi bialah candidate tam berin 24 an awm a, Kapilvaswtu leh Etwa bialah chuan candidate paruk ve ve awmin an tlemna ber a ni.

Assembly seat 403 awmna, Uttar Pradesh inthlan hi thawh sarihah neih a ni dawn a, inthlan thawh rukna leh thawh sarihna chu March 2 leh 4 khian neih a ni leh dawn a, March 11-ah vote tlate hi chhiarin, inthlan result puan nghal a ni ang.