Kum 15-18 inkar zinga 80% chuangin Covid vaccine dose khatna an la tawh

Union health minister Mansukh Mandaviya chuan tleirawl kum 15-18 inkar zingah Covid-19 vaccine dose khatna la 80% chuang an awm tawh a, ram pumah vaccine hi dose vaibelchhe 192 chuang pek a ni tawh bawk tih a sawi.

Sorkar laipui chuan kumin January 3 aṭang khan kum 15-18 inkarte tan Covid-19 vaccine hi a pe chhuak tawh a, he age group-ah hian Thawhlehni zan dar 7 thleng khan vaccine la hi vaibelchhe 5.92 an tling tawh a ni.

March 26 aṭang khan naupang, kum 12-14 inkarte vaccine hi pek ṭan a ni bawk a, an zingah Thawhlehni zan thlengin mi vaibelchhe 3.31 ten vaccine hi an la tawh bawk.

Minister Mandaviya chuan khawvela vaccine drive lian ber kalpui meknaah, ṭhalaite zingah vaccine la zat hi an pung zel a ni, a ti.

India ram pumah Covid-19 vaccine hi nikum January 16 aṭang khan pe chhuak ṭanin, a hmasa berah hian healthcare worker-te pek an ni. Hemi kum vek February 2 aṭangin a thawh hnihna atan frontline worker-te pek an ni leh a ni. March 1-ah kum 60 chung lam leh, kum 45 chin natna benvawn neite pek ni lehin, April 1 aṭangin kum 45 chunglamte pek an ni. Sorkar laipui chuan vaccine pek chhuah hna hi zau zawka kalpui zelin, nikum May 1 aṭang khan ram pumah kum 18 chunglamte chu pek ṭan a ni ve leh bawk.